Монгол Улсын Засгийн газрын гишүүн, Зам, тээврийн сайд Б.Дэлгэрсайхан өнөөдөр (2025.07.02) БНХАУ-ын Тяньжин хотноо зохион байгуулагдаж буй “Шанхайн хамтын ажиллагааны байгууллагын гишүүн орнуудын Тээврийн сайд нарын 12 дугаар уулзалт”-д оролцож, үг хэллээ.

Уг хуралд дэлхийн 30 орчим улс орны тээврийн сайд нар, тээврийн салбарын удирдах албан тушаалтнууд оролцож байна.

Монгол Улсаас Засгийн газрын гишүүн, Зам тээврийн сайдаар ахлуулсан тээврийн салбарын удирдах албан тушаалтнууд , Сайдын Зөвлөх Г.Гангаа, Засгийн газрын хэрэгжүүлэгч агентлаг Төмөр замын газрын дарга Б.Артур, Иргэний нисэхийн ерөнхий газрын дарга Э.Төрбаяр, ЗТЯ-ны Гадаад харилцааны хэлтсийн дарга Б.Нямдаваа, Б.Мөнх-Эрдэнэ нар оролцож байна.

ШХАБ-ын гишүүн орнуудын Тээврийн сайд нарын 12 дугаар уулзалт нь тус байгууллагын гишүүн болон ажиглагч орнуудын зам, тээврийн салбар дахь өнөөгийн байдал,ирээдүйн чиг хандлагыг хэлэлцэж, тээврийн салбар дахь дэд бүтцийг хамтран хөгжүүлэх, хамтын ажиллагааг өргөжүүлэх талаар олон талт санал солилцдог чухал арга хэмжээ юм.

Зам, тээврийн сайд Б.Дэлгэрсайхан тус хуралдаанд хэлсэн үгэндээ Монгол Улс нь Ази, Европыг холбосон газар зүйн байршлын онцлогтоо тулгуурлан худалдаа, аялал жуулчлал, тээвэр ложистикийн сүлжээ, ачаа тээврийн урсгалыг нэмэгдүүлэхэд онцгой анхаарч ажиллаж байгааг хэллээ.

Энэ хүрээнд Монгол Улс худалдаа, тээврийг хөнгөвчлөх, далайд гарах, дамжин өнгөрөх тээврийг хөгжүүлэх чиглэлээр тууштай нээлттэй бодлого барьж, шинэ төмөр замын сүлжээ барих, авто замын сүлжээг өргөжүүлэх, усан замын тээврийг хөгжүүлэх, олон улсын нисэх онгоцны буудал, бүс нутгийн тээвэр, логистикийн төв шинээр барих зэрэг дэд бүтцийн томоохон бүтээн байгуулалтын ажлуудыг эхлүүлээд байгааг дурьдлаа.

Мөн хилийн боомт, бүсийн төв, тээврийн нэгдсэн сүлжээ бүхий газарт логистикийн төв, ачаа, зорчигчийн терминал байгуулах томоохон төслүүдийг хэрэгжүүлэхээр төлөвлөөд ажиллаж байгаагаа хэллээ.

ШХАБ-ын гишүүн орнууд нь манай улсын тээврийн салбарын хамгийн том, чухал түнш орнууд учраас далайд гарцгүй улс орнуудад тулгарч буй нийтлэг сорилт, бэрхшээлүүдийг шийдвэрлэхийн тулд ШХАБ-ын оролцогч орнуудын зам, тээврийн салбар дахь харилцан ойлголцол, хамтын ажиллагаа, нэгдмэл байр суурь нэн чухал байгааг онцлон тэмдэглэлээ.

Энэ удаагийн ШХАБ-ын гишүүн орнуудын Тээврийн сайд нарын 12 дугаар уулзалтад ОХУ, БНХАУ, Казахстан, Киргиз, Тажикистан, Узбекистан, Энэтхэг, Турк зэрэг улсын тээврийн сайд нар, зам тээврийн салбарын удирдах албан тушаалтнууд, олон улсын байгууллагын төлөөлөгчид оролцож байна.