Монгол Улсын Засгийн газрын гишүүн, Зам, тээврийн сайд Б.Дэлгэрсайхан өнөөдөр (2025.07.02) Монгол, Орос, Казахстан гурван улсын Тээврийн сайд нартай албан уулзалт хийлээ.

Уулзалтаар Зам, тээврийн сайд Б.Дэлгэрсайхан ОХУ, БНХАУ, Казахстан улстай сайн хөршийн өргөн хүрээтэй, харилцан ашигтай хамтын ажиллагаагаа хөгжүүлэхэд илүү түлхүү анхаарч, “Монгол, Орос, Хятадын эдийн засгийн коридор байгуулах хөтөлбөр”-т туссан авто зам, төмөр зам, автотээврийн салбар дахь хамтын ажиллагааг харилцан ашигтай байдлаар илүү өргөжүүлэх нь чухал байгааг онцоллоо.

Мөн хөрш орнуудын тээврийн салбар дахь хамтын ажиллагааг хөгжүүлэх хүрээнд агаарын тээвэр, автотээвэр, төмөр замын салбарт шийдэл хүлээж буй ажлуудын талаар санал солилцож, тулгамдаж буй асуудлыг хэрхэн шийдвэрлэх тухай ярилцлаа.

Тухайлбал, ОХУ-ын тээврийн яамны Төрийн Нарийн Бичгийн Дарга, Дэд сайд Зверев Дмитрий Станиславовичтэй хоёр талт уулзалтыг хийж тээврийн салбарын хамтын ажиллагаа, төмөр замын шинэ төсөл хөтөлбөрүүдийн талаар санал солилцсон. Энэ хүрээнд маршрут чиглэлийг илүү тодорхой төлөвлөх, дахин судлах нягтлах, эргэн уулзаж санал солилцохоор тохиролцлоо.

Мөн Монгол, Орос,Казахстан гурван улсын нутгаар дамжин өнгөрөх тээврийг хөгжүүлэх, агаарын тээврийн салбарт харилцан шууд нислэг үйлдэх, нислэгийн тоог нэмэгдүүлэх, зорчигч тээврийн урсгалыг сайжруулахад анхаарч ажиллах тухай ярилцлаа.

Хөрш зэргэлдээ улс орны хувьд улс орны нийгэм, эдийн засагт тулгарч буй хүндрэл бэрхшээлүүдийг шийдвэрлэхэд Монгол Улсын Засгийн газрын дэд бүтэц, бүс нутгийг хөгжүүлэх бодлого чиглэлтэй уялдуулан шинэ төмөр зам тавих, одоо байгаа төмөр замуудыг засварлаж шинэчлэх, зорчигч тээврийн галт тэргийг шинэчлэн сайжруулах, ард иргэдийг аюулгүй, тав тухтай зорчих боломжийг бүрдүүлэхэд Монгол, Орос, Хятад, Казахстан улсын зам, тээврийн салбар дахь харилцан ойлголцол, хамтын ажиллагаа, нэгдмэл байр суурь нэн чухал байгааг онцлон тэмдэглэлээ.