Монгол Улсын Засгийн газрын гишүүн, Зам, тээврийн сайд Б.Дэлгэрсайханаар ахлуулсан Ажлын хэсгийнхэн өнөөдөр (2025.07.03) БНХАУ-ын Бээжин хотноо Хятадын төмөр замын констрашин “CRCC” грүппийн удирдлагуудтай уулзлаа.

Талууд уулзалтаар Гашуунсухайт-Ганцмод боомтын төмөр замын бүтээн байгуулалтын ажлыг хариуцлагатай чанартай хийж гүйцэтгэх,тулгамдаж буй зарим асуудлыг хоёр талаас шуурхай шийдвэрлэх, Монгол Улсын Засгийн газар, Гадаад харилцааны яам, Хил гаалийн байгууллагад ажлын явцыг танилцуулж, шаардагдах тусгай зөвшөөрлийн хүсэлтийг албан бичгээр хүргүүлж уламжлах, барилгын ажлыг гүйцэтгэхэд шаардлагатай урьдчилгаа төлбөрийг шилжүүлэх зэрэг асуудлыг ойрын хугацаанд шийдвэрлэж, аль болох цаг хугацааг шахаж ажиллах тухай ярилцлаа.

Өнөөдрийн байдлаар CRCC” грүппийн зүгээс:

Гашуунсухайт-Ганцмод боомтын төмөр замын бүтээн байгуулалтын бэлтгэл ажлын хүрээнд 433 ажиллах хүч, 32 техник хэрэгсэл Хятадын хил дээр холбогдох зөвшөөрлөө хүлээгээд байж байгааг CRCC” грүппийн Дай Хөгэн захирал хэллээ.

Зам, тээврийн сайд Б.Дэлгэрсайхан Монгол улс хүн ам цөөн хэдий ч өргөн уудам газар нутагтай, өнцөг булан бүрт тээврийн үйлчилгээг хүргэх, хүртээмжийг бий болгох, тээврийн дэд бүтцийн сүлжээг өргөжүүлэх ажил нэн чухал байгааг онцлоод, хамгийн эхэнд Гашуунсухайт-Ганцмод боомтын хил холболтын төмөр замын бүтээн байгуулалтын ажлыг хариуцлагатай хийх, цаашид нийслэл хотын дэд бүтцийг тэлэх, Монгол Улсын тээврийн салбарт олон том бүтээн байгуулалтын төслүүд дээр хамтран ажиллах хүсэлтэй байгаагаа илэрхийллээ.