Монгол Улсын Засгийн газрын гишүүн, Зам, тээврийн сайд Б.Дэлгэрсайхан тэргүүтэй төлөөлөгчид өнөөдөр (2025.07.03) Хятадын “Чайна Энержи” группийн төв байранд зочилж, удирдах албан тушаалтнуудтай уулзлаа

БНХАУ-ын “Чайна Энержи” групп бол Гашуунсухайт-Ганцмод боомтын хил дамнасан төмөр зам, нүүрсний худалдаа, Тавантолгой нүүрсний уурхайн хүчин чадлыг нэмэгдүүлэх хамтын ажиллаагааны тухай Монгол, Хятад хоёр улсын Засгийн газар хоорондын хэлэлцээр”-ийн хүрээнд Тавантолгой-Гашуунсухайт чиглэлийн төмөр замын тээврийн үйл ажиллагааг гүйцэтгэгч байгууллага болох “Монголын төмөр зам” ТӨХК “Чайна энержи коксжих нүүрс (Тяньжин”) компанитай “Нүүрс тээвэрлэлтийн урт хугацааны гэрээ”-г хэрэгжүүлэхээр гарын үсэг зурж баталгаажуулсан билээ.

Тодруулбал, энэхүү гэрээг Гашуунсухайт-Ганцмод боомтын Монгол, Хятадын хилийн зурваст 2025 оны 05 дугаар сарын 14-нд албан ёсоор баталгаажуулж, нүүрс тээврийн үйл ажиллагааг өнгөрсөн сард албан ёсоор эхлүүлсэн.

Тиймээс энэхүү уулзалтаар Зам, тээврийн сайд Б.Дэлгэрсайхан Нүүрс тээвэрлэлтийн урт хугацааны гэрээг хэрэгжүүлэх ажлын тухай хэлэлцэж, нүүрс тээврийг төлөвлөгөө ёсоор цаг хугацаанд нь тээвэрлэх талаар харилцан санал солилцлоо.

Нүүрс тээвэрлэлтийн урт хугацааны гэрээгээр манай улс нийт 16 жилийн хугацаанд 247 сая тонн ачаа тээвэрлэж, улмаар Монгол Улсын эдийн засагт бодитой хувь нэмэр оруулж, өнөөгийн үнэ цэнээр 3,7 тэрбум ам.долларын орлого олох эдийн засгийн өндөр үр ашигтай тооцоолол бий.

Зам, тээврийн яам ийнхүү 21 жил гацсан Гашуунсухайт–Ганцмод боомтын хил дамнасан төмөр замын бүтээн байгуулалтын ажлыг эхлүүлж, 700 хоногт багтаан ашиглалтад оруулахаар төлөвлөсөн бөгөөд энэ хугацаанд нүүрс тээврийг төмөр зам, авто тээвэр болон холимог тээврээр гүйцэтгэхээр төлөвлөөд ажиллаж байна.

Нүүрс тээвэрлэлтийн урт хугацааны гэрээгээр тээвэрлэгч компани болох “Монголын төмөр зам” энэ онд 5 сая тонн ачаа тээвэрлэх үүргийг хүлээсний дагуу сард 800 мянга гаруй тонн ачаа тээвэрлэх шаардлагатай байгаа бөгөөд өдөрт 58 вагон бүхий 9 галт тэрэг, 260 тээврийн хэрэгсэл экспортын тээврийг гүйцэтгэх төлөвлөгөөтэйгөөр ажлаа эхлүүлээд байгаа юм.

Энэхүү уулзалтаар “Цахим худалдааны компани”-ийн ТУЗ-ын дарга Жан Яншэн “Бид Тавантолгой өртөөн дээр одоогоор нийт 30 мянган тонн нүүрс хүлээж аваад байна. Энэ ажилд зарим тулгамдсан асуудлыг шуурхай шийдвэрлэж өгсөн Зам, тээврийн сайд Б.Дэлгэрсайхан танд талархаж буйгаа илэрхийлье. Ажил дөнгөж эхэлж байгаа учраас хоёр талаас шийдвэрлэх шаардлагатай тулгамдсан асуудлууд мөн байсаар байна.

Тухайлбал, нүүрсний ачаа тээвэр 1-2 хоногоор саатах, уурхайн ам руу автомашин нэвтэрч орох боломжгүй байгаагаас үүдэн нүүрс тээвэрлэлтийн ажил явц дундаа хүлээх, саатах тохиолдол гарч байна. Энэ нь нүүрс тээвэрлэлт төлөвлөсөн хугацаанд амжихгүй байх магадлалтай байна” гэлээ.

Мөн “Чайна Энержи” интернэйшнл компанийн ТУЗ-ын дарга Ву Чуань “Бид энэ ондоо багтаад ажиллах хүчний 30 хувийг илгээх саналтай байна. Мөн энэ сардаа багтаад Монгол Улсад компани байгуулах шаардлагатай байгааг хэллээ.

Зам, тээврийн сайд Б.Дэлгэрсайхан Монголын Төмөр зам ТӨХК-ийнмнүүрс тээвэрлэлтийн өдөр тутмын үйл ажиллагаа болон зохион байгуулалтын талаарх мэдээлэлд анхаарч ажиллахаа илэрхийллээ.

Монгол, Хятад талаас өдөр тутмын ажлуудын талаарх мэдээллийг шуурхай солилцох хүн томилж ажиллуулбал хоёр талдаа оновчтой зохион байгуулалт хийх болно.

Мөн цаашид цаг хэмнэж, ажил нугалах үүднээс өөр хилийн боомтоор нэмэлт гарц гаргаж, нүүрс тээвэрлэлт хийх, нүүрс тээврийн давтамжийг нэмэгдүүлэх боломжтой гэсэн саналыг бас хэллээ.

Энэ хүрээнд ажлын хэсэг байгуулж үнэ өртөг, холбогдох тооцооллыг хийж, эргэн санал солилцох хүсэлтэй байгаагаа илэрхийлэв.

Уулзалтад БНХАУ-ын талаас:

• ”Чайна Энержи” группийн туслах ерөнхий захирал Кан Фэнвэй
• ”Чайна Энержи” группийн Олон Улсн Хамтын Ажиллагааны газрын дарга Жун Руёо
• ”Цахим худалдааны компанийн ТУЗ-ын арга Жан Яншэн
• ”Чайна Энержи” интернэйшнл компанийн ТУЗ-ын дарга Ву Чуань
• Нүүрс тээвийн газрын дарга Ли Руйжунь
• ”Бао Шэнь” төмөр зам компанийн гүйцэтгэх захирлын орлогч Бай Зижунь
• Цахим худалдааны компанийн гүйцэтгэх захирлын орлогч Чэнь Юаньчунь
• ”Чайна Энержи” интернэйшнл компанийн Монгол дахь төлөөлөгчийн газрын дарга, орчуулагч Жин Гэ
• ”Цахим худалдааны компанийн үйл ажиллагааны Хяналтын хэлтсийн дарга Ли Хайтао
• ”Чайна Энержи” интернэйшнл компанийн Монгол дахь төлөөлөгчийн газрын дэд дарга Жан Дайюе
• ”Чайна Энержи” группийн Ганцмод төмөр замын хөрөнгө оруулалтын ХХК-ийн төлөвлөгөөний хэлтсийн гуравдугаар зэргийн менежер Ван Вэй