Зам, тээврийн сайд Б.Дэлгэрсайханы хэлсэн үгийг бүрэн эхээр нь хүргэж байна.

“Өндөрхаан” нисэх буудлыг олон улсын 4С ангилалд хүргэж, агаарын тээврийн сүлжээг өргөжүүлнэ

Бидний дараагийн зорилго бол “Өндөрхаан” нисэх буудлыг ангилал дээшлүүлэх буюу Олон улсын иргэний нисэхийн байгууллагa (ICAO)-ын 4С ангилалд хүргэж, агаарын тээврийн сүлжээг өргөжүүлэх явдал юм.

Энэ хүрээнд 2024 онд талууд хэлэлцсэний үр дүнд Кувейтийн сантай хамтран тус нисэх буудлыг өргөтгөх төслийн техник, эдийн засгийн үндэслэлийг боловсруулах хэлэлцээр байгуулсан бөгөөд зөвлөх сонгон шалгаруулах ажиллагаа явагдаж байна.

Ирэх жилүүдэд тус нисэх буудлын зорчигч үйлчилгээний барилга, байгууламжийг өргөтгөж, 3,100м урт хатуу хучилттай зурвас, шинэ аэродромын байгууламж бүхий олон улсын шаардлагад бүрэн нийцсэн нисэх буудал Хэнтий нутгаас сүндэрлэх болно.

Ингэснээр орон нутгийн хуваарьт нислэгтэй болж,улмаар ОХУ, БНХАУ, Япон, БНСУ, Казахстан, Туркменистан, Зүүн өмнөд азиас олон улсын жуулчны захиалгат болон хуваарьт шууд нислэг хүлээн авах боломжтой болно

Хэнтий аймаг бол Монголын төр улсыг үндэслэгч Их эзэн Чингис хааны өлгий нутаг бөгөөд Монгол Улсын Засгийн газраас зүүн бүсийг түүхэн аялал жуулчлалын бүс болгон зарласан. Энэхүү бүтээн байгуулалт нь зөвхөн дэд бүтцийн хөгжил бус, аялал жуулчлал, эдийн засаг, орон нутгийн хөгжлийн томоохон түлхэц болох юм.

Арабын эдийн засгийн хөгжлийн Кувейтийн сангийн зүгээс манай улсын бүс нутгийн тээврийн дэд бүтцийг сайжруулахад оруулсан хувь нэмэр, итгэл, дэмжлэгт Монгол Улсын Зам, тээврийн яамны нэрийн өмнөөс болон хувиасаа гүн талархал илэрхийлье.