"Дэлхийн өндөр хурдны төмөр замын 12 дугаар их хурал”-д Зам, тээврийн сайд Б.Дэлгэрсайханы хэлсэн үгийг бүрэн эхээр нь хүргэж байна.

"Эрхэм хүндэт Олон Улсын төмөр замын холбооны дарга ноён Алан Бэроуд,

Эрхэм хүндэт Бүгд Найрамдах Хятад Ард Улсын Төрийн зөвлөлийн Ерөнхий сайдын орлогч Жан Гуочин,

“Хятадын төмөр замууд” корпорацийн Төлөөлөн удирдах зөвлөлийн дарга Гуо Жусюе,

Эрхэм хүндэт Олон улсын төмөр замын холбооны гишүүн орны төлөөлөгчид өө,

Юуны өмнө энэхүү чухал арга хэмжээнд үг хэлэх боломжийг олгосон Олон улсын төмөр замын холбоо болон зохион байгуулагч “Хятадын төмөр замууд” корпорацид Монгол Улсын Зам, тээврийн яамны нэрийн өмнөөс болон өөрийн зүгээс чин сэтгэлийн талархал илэрхийлье.

Энэхүү чуулга уулзалт нь өндөр хурдны төмөр замын дэвшилтэт технологи, инноваци, шинэ шийдлүүдийг нэвтрүүлсэн олон улсын туршлагаас хуваалцаж, суралцах, мөн олон талт хамтын ажиллагааг цаашид гүнзгийрүүлэх чухал ач холбогдолтойгоос гадна гишүүн орнуудын хооронд эрх тэгш, харилцан хүндэтгэсэн, харилцан ашигтай байх үндсэн дээр найрсаг харилцааг улам бэхжүүлэх, эдийн засгийн хамтын ажиллагааг өргөжүүлэх чухал ач холбогдолтой гэж харж байна.

Далайд гарцгүй, хүн ам цөөн, өргөн уудам газар нутагтай Монгол орны хувьд Ази-Европыг холбосон дамжин өнгөрөх стратегийн давуу байршлаа ашиглан тээврийн олон талт сүлжээг хөгжүүлэх нь манай улсын нийгэм, эдийн засгийн хөгжилд ихээхэн ач холбогдолтой юм.

Монгол Улсын Засгийн газраас худалдаа, тээврийг хөнгөвчлөх, далайд гарах, дамжин өнгөрөх тээврийг хөгжүүлэх чиглэлээр тууштай нээлттэй бодлого барьж, тэр дундаа шинэ төмөр зам барих, төмөр замын хилийн гарцуудыг нэмэгдүүлэх, бүс нутгийн тээвэр, логистикийн төв шинээр байгуулах зэрэг дэд бүтцийн томоохон бүтээн байгуулалтын ажлуудыг хэрэгжүүлсээр байна.

2016 онд Монгол-Орос-Хятадын эдийн засгийн коридор байгуулах хөтөлбөрт Москва-Бээжин чиглэлийн өндөр хурдны төмөр замын шугамыг Монгол Улсын нутаг дэвсгэрээр дамжуулан барих хэтийн боломжийг судлахаар санаачилга гарсан байдаг.

Монгол Улсын Зам, тээврийн яамны зүгээс Бүгд Найрамдах Хятад Ард Улсын Засгийн газраас Зүүн Өмнөд Азид хэрэгжүүлсэн төслүүдийг сайтар судалж үзсэн бөгөөд ийм жишгээр манай улсын нийслэл Улаанбаатар хотыг дайруулж Хятад-Оросыг холбосон 160-200км/цагийн хурдтай цахилгаан төмөр замын сүлжээ байгуулах төслийг хөрш орнуудтайгаа хамтран хэрэгжүүлэх хүсэлтэй байна. Ингэхдээ дэд бүтцийн сүлжээнд холбогдох зайг харгалзаж эхний ээлжинд манай улсын хилийн цаана 300 гаруй киломерт байгуулагдсан хятадын хурдны төмөр замын сүлжээтэй холбож, дараа нь Оросын талтай залгах сонирхолтой байна. Үүнд Хятад, Оросын талыг дэмжин хамтран оролцоно гэж
найдаж байна.

Хурдны төмөр зам нь дэлхий даяар тулгамдаж буй хүлэмжийн хийг бууруулах, уур амьсгалын өөрчлөлтийг сааруулах, хот хөдөөгийн хөгжлийн тэнцвэрийг бий болгох, алслагдсан бүс нутгуудыг хөгжүүлэх чухал ач холбогдолтой нийгэм-эдийн засгийн хөгжлийн хурдасгуур гэж үзэж байна.

Та бүхний хамтын ажиллагаанд гүнээ талархал илэрхийлж, энэ удаагийн хуралд өндөр амжилт хүсье.

Анхаарал хандуулсанд баярлалаа".