“Дэлхийн өндөр хурдны төмөр замын 12 дугаар их хурал” өнөөдөр (2025.07.08) БНХАУ-ын Бээжин хотноо эхэлж байна.

Энэхүү өндөр хурдны төмөр замын олон улсын хурал нь 2-3 жилд нэг удаа зохион байгуулагддаг бөгөөд өдгөө дэлхий нийтийн эдийн засаг, худалдаа, дэд бүтэц, технологийн салбарынхан дунд хүлээлт үүсгэсэн чухал арга хэмжээ болжээ.

2025 оны “Дэлхийн өндөр хурдны төмөр замын 12 дугаар их хурал”-ыг БНХАУ-ын “Хятадын төмөр замуудын корпораци”, Олон улсын төмөр замын холбоо”-ноос хамтран зохион байгуулж байгаа бөгөөд энэ сарын 8-11-ний хооронд Бээжин хотод дөрвөн өдрийн турш үргэлжлэх юм.

Тус хуралд олон улсын тээврийн салбарын сайд нар, төмөр замын байгууллагуудын удирдах албан тушаалтнууд, дэлхийд тэргүүлэгч төмөр замын аж ахуйн нэгжүүдийн удирдлагууд, өндөр хурдны төмөр зам (HSR)-ийн ахлах мэргэжилтнүүд болон олон улсын эрдэмтэн судлаачид, дэлхийн шилдэг инженер техникийн төлөөлөгчид оролцож байна.

Тухайлбал, Олон улсын төмөр замуудын холбоо (UIC)-ны дарга Алан Бэроуд, “Хятадын төмөр замуудын корпораци" ХХК-ийн Ерөнхий захирал Сун Шюдө, БНХАУ-ын Хятадын Коммунист Намын Улс төрийн товчооны гишүүн, Төрийн зөвлөлийн Ерөнхий сайдын орлогч Жан Гуочин, Бүгд Найрамдах Киргиз Улсын Шадар сайд Бакыт Торобаев, Бүгд Найрамдах Ардчилсан Лаос Ард Улсын Үндэсний Асемблейн дэд дарга Соммад Фолсена, БНХАУ-ын Тээврийн сайд Лю Вэй, Монгол Улсын Зам, тээврийн сайд Б.Дэлгэрсайхан, Узбекстан Улсын Тээврийн сайд Махкамов Илхом Рустамович, Олон улсын төмөр замуудын холбооны Тамгын дарга Франсуа Дэвен болон бусад холбогдох албаны зочид төлөөлөгчид оролцож байна.

Монгол Улсаас Засгийн газрын гишүүн, Зам, тээврийн сайд Б.Дэлгэрсайханаар ахлуулсан Ажлын хэсэг буюу Засгийн газрын хэрэгжүүлэгч агентлаг Төмөр замын газрын дарга Б.Артур, Төмөр замын газрын Гадаад харилцааны хэлтсийн дарга Э.Наранцэцэг, “Улаанбаатар төмөр зам” ХНН-ийн Тээвэрлэлт, хөдөлгөөн хариуцсан замын орлогч дарга Д.Амарбаясгалан, Гадаад харилцааны албаны дарга Б.Галсандорж , “УБТЗ” ХНН-ийн Бээжин дэх Төлөөлөгчийн газрын тэргүүн А.Анар, Д.Тэлмэн нар оролцож байна.

Энэ жилийн өндөр хурдны төмөр зам: “Инновац, хөгжил амьдралыг улам сайхан болгоно" уриан дор зохион байгуулагдаж байгаа бөгөөд тус хурлаар дэлхийн өндөр хурдны төмөр замын хамгийн сүүлийн үеийн технологийн шийдэл, ирээдүйн чиг хандлагыг хэлэлцэх, хурдны төмөр зам хөгжсөн орнууд туршлага мэдлэгээ харилцан солилцох, судалгаа шинжилгээ, инноваци технологийг улам хөгжүүлэх тухай олон талт асуудлыг хэлэлцэж байна.

“Дэлхийн өндөр хурдны төмөр замын 12 дугаар их хурал” хүн амын тоогоороо дэлхийд тэргүүлдэг БНХАУ төмөр замын уртаараа ч олон улсад тэргүүлж эхлээд байгаагийн нэгэн том илэрхийлэл болж байна.

БНХАУ 2024 оны жилийн эцсийн байдлаар, Хятад улсын хэмжээнд нийт 162,000 км төмөр зам ашиглагдаж байгаагаас үүний 48,000 нь өндөр хурдны төмөр замын сүлжээ байна. Уг замаар 2024 онд давхардсан тоогоор нийт 4.085 тэрбум зорчигч, 3.985 тэрбум ачаа тээвэрлэжээ.

“Дэлхийн өндөр хурдны төмөр замын 12 дугаар их хурал” -ын нээлтийн үйл ажиллагаанд Олон улсын төмөр замуудын холбоо (UIC)-ны дарга Алан Бэроуд хэлсэн үгэндээ өндөр хурдны төмөр замын хөгжлийн асуудлаар сайн туршлагаа харилцан хуваалцаж, тулгамдаж буй асуудлаа хэлэлцэх олон улсын дээд хэмжээний чуулга уулзалтад хүрэлцэн ирсэн зочид төлөөлөгчдөд талархал илэрхийлээд, хурдны төмөр зам нь аюулгүй, бага нүүрстөрөгч ялгаруулах, байгальд ээлтэй масс тээврийн хэрэгсэл бөгөөд цахим шилжилт, технологийн эрин үед иргэдэд илүү тав тухай, хялбар зорчих боломжийг олгож байгааг дурдлаа.

Мөн “Хятадын төмөр замуудын корпораци" ХХК-ийн Ерөнхий захирал Сун Шюдө хэлсэн үгэндээ БНХАУ-ын дарга Ши Жиньпинийн зүгээс өндөр хурдны төмөр замын хөгжилд онцгой анхаарал хандуулж, мэргэжлийн байгууллагуудын хичээл зүтгэлээр өнгөрсөн жилүүдэд Хятад улсад өндөр хурдны төмөр зам үсрэнгүй хөгжиж, өнөөдрийн байдлаар дэлхийн нийт өндөр хурдны төмөр замын сүлжээний 2/3-той тэнцэх дэлхийн хамгийн урт 48 мянган километр үргэлжлэх сүлжээг байгуулж, технологийн хувьд хамгийн өндөр хурдтай төмөр замын тээврийн системийг өргөн хэрэглээнд нэвтрүүлээд байна.

Өндөр хурдны төмөр замаар өдөрт 16 сая зорчигчдийг тээвэрлэж, нийт 26 сая тасалбар дунджаар борлуулагдаж байгааг онцоллоо. Цаашид хиймэл оюун ухаан, шинэ эрчим хүчний шинэчлэлтийг тасралтгүй хийж, ирэх 2035 он хүртэл дотоодын өндөр хурдны төмөр замын сүлжээг 350 километр хүртэл өргөжүүлэх зорилт тавин ажиллаж байгааг танилцууллаа.

БНХАУ-ын Төрийн зөвлөлийн Ерөнхий сайдын орлогч Жан Гуочин “БНХАУ-д өндөр хурдны төмөр зам нь гадаадын технологийг нэвтрүүлэх, нутагшуулах, инноваци технолгийг хөгжүүлэхээс бие даан зохион бүтээх хүртэл шат ахин хөгжиж ирсэн бөгөөд өдгөө дэлхийн өндөр хурдны төмөр замын салбарыг түүчээлсэн тэргүүлэгч орон болон хөгжиж байна. Газарзүйн төлөвшлийг даван туулсан хурдны төмөр замын гүүр, туннель болон 350 км/цаг хурдтай зорчигч тээвэрт нэвтэрсэн CR маркийн Fuxing галт тэрэг нь Хятадын хөгжлийн нэрийн хуудас болсон. Хятад-Лаосын өндөр хурдны галт тэрэг болон ашиглалтыг хамтран хэрэгжүүлж буй Индонезийн Жакарта-Бандун чиглэл, Унгар-Серби чиглэлийн өндөр хурдны төмөр замын төслүүд ар араасаа ашиглалтад орж, Хятадын технологийг олон улсад нутагшуулж байна. Цаашид дэд бүтэц, стандарт норм журмын хатуу, зөөлөн холболтыг нэмэгдүүлж, технологийн ололт туршлагаа хуваалцан ажиллахад бэлэн байна.

Үүнээс гадна, Киргиз, Лаосын талууд Хятадтай хамтран хэрэгжүүлж буй бүтээн байгуулалтын хүрээнд өндөр хурдны төмөр замын сүлжээ байгуулах улс орны хэтийн зорилгоо биелүүлсэнд баяртай байгаагаа илэрхийллээ.