"Монголын Эдийн Засгийн форум-2025" "Итгэлцлийг дахин сэргээх нь" уриан дор үргэлжилж байна.

Энэ удаагийн форумд гадаад, дотоодын 3000 гаруй хөрөнгө оруулагч, бизнес эрхлэгч, бодлого боловсруулагч, олон улсын байгууллагын төлөөлөл  оролцож байна.

Ерөнхий сайд Г.Занданшатар форумыг нээж хэлсэн үгэндээ эдийн засаг, хөгжлийн бодлого, хөрөнгө оруулалт, бизнесийн орчныг хэрхэн сайжруулах талаар онцоллоо.

Монголын Эдийн Засгийн Форум нь эдийн засаг, нийгмийн хөгжлийн тулгамдсан асуудлыг хэлэлцэж, шийдэл гаргахад чиглэсэн үндэсний тэргүүлэх платформ юм.

2010 оноос хойш жил бүр зохион байгуулагддаг уг форум нь төрийн бус, ашгийн төлөө бус, улс төрөөс хараат бус байгууллага. Монгол Улсын Засгийн газар, хувийн хэвшил, иргэний нийгэм, эрдэм шинжилгээний байгууллага болон олон улсын төлөөллийг оролцуулсан өндөр түвшний нээлттэй хэлэлцүүлгийг жил бүр өрнүүлсээр ирсэн.

"Бүсчилсэн хөгжил ба тээвэр логистикийн хөрөнгө оруулалт" салбар хуралдаанаар үргэлжилж байна. Салбар хуралдаанд УИХ-ын дэд дарга Х.Булгантуяа, Монгол Улсын Шадар сайд С.Амарсайхан, Зам, тээврийн яамны Төрийн нарийн бичгийн дарга С.Батболд, "Stonex Group Inc”-ийн Азийг хариуцсан зээлийн хэлтсийн дарга Billy Kewley тэргүүтэй төлөөлөгчид оролцож, санал бодлоо хуваалцаж байна.

Тухайлбал, Монгол Улсын урт хугацааны хөгжлийн бодлого “Алсын хараа-2050”, “Монгол Улсын бүсчилсэн хөгжлийн үзэл баримтлал”, “Шинэ сэргэлтийн бодлого” дунд хугацааны хөгжлийн хөтөлбөр Монгол Улсын Засгийн газрын 2024-2028 оны үйл ажиллагааны хөтөлбөрт зам, тээврийн салбар нь хөгжлийн тэргүүлэх салбаруудын нэг бөгөөд эдийн засгийн өсөлтийг дэмжигч, хөгжлийг хурдасгагч, бүс нутгийн интеграцид холбогч салбар мөн болохыг тодотгосон. Ази, Европ өрнө дорныг холбосон газар зүйн байршлын давуу талаа ашиглан тээвэр, худалдаа, үйлчилгээний зангилаа “Транзит Улс” болох зорилтыг тавьж, бүс нутгийн хамтын ажиллагааны механизмуудад нэгдэж, идэвхтэй оролцогч байхыг эрмэлзэж байна.

Олон улс, бүс нутаг, хөрш орнуудын эдийн засгийн интеграц, урт хугацааны бодлого төлөвлөлттэй уялдуулан Монгол улсын урт хугацааны бодлогыг тодорхойлсон нь эдийн засгийн салбарууд бодлогоо оновчтой тодорхойлох чухал ач холбогдолтой юм.

Монгол Улсыг бүсчилсэн хөгжлийн бодлогоор эдийн засгийн чөлөөт бүс, тусгай бүс, хуурай боомт, орон нутгийн хөгжлийн төвүүдийг эдийн засгийн коридортой үе шаттайгаар холбож үйлдвэр, үйлчилгээ, худалдааны цогцолборуудыг байгуулах, хотуудын кластер үүсгэн тээвэр, логистикийн нэгдсэн сүлжээг байгуулах нь хөгжлийн суурь болохыг оролцогчид онцолж байв.

Иймд тээвэр, логистикийн салбарт тулгамдаж буй асуудлыг тодорхойлж, хөгжлийн хязгаарлагдмал байдал, эрсдэлийг бууруулах боломж, шийдвэрлэх арга замыг хэлэлцэж, салбарын хөгжилд гадаад, дотоодын хөрөнгө оруулалтыг нэмэгдүүлэх, хөрөнгө оруулалтын шинэ хэлбэрийг нэвтрүүлэх боломжийг эрэлхийлэхэд чиглэнэ.

Монгол Улс өргөн уудам нутаг дэвсгэртэй, хүн ам цөөнтэй, зах зээл жижигтэй, суурин газрууд алслагдмал байдалтай тархан сууршсан нь тээвэр, логистикийн дэд бүтцийн хөрөнгө оруулалтыг үлэмж нэмэгдүүлдэг, эрс тэрс уур амьсгал нь дэд бүтцийн засвар арчлалтын зардлыг ихээр шаарддаг зэргээр тээвэр, логистикийн хөгжил өндөр орнуудтай харьцуулахад ялгаатай, хөрөнгө оруулагчдын сонирхлыг татах чадвар сул байдаг. Гэхдээ тээвэр, логистикийн салбар нь бүс нутгийн интеграцид нэгдсэнээр эдийн засгийн өндөр үр ашигтайгаар өргөжин тэлэх бүрэн боломжтой юм. Энэхүү хуралдаанаар тээвэр, логистикийн олон улсын холболт, түүнд чиглэсэн бодлогын зорилго, зорилт, томоохон бүтээн байгуулалтын төслүүдийн талаар мэдээлэл өгч, хамтын ажиллагааны боломжуудыг нээлттэй хэлэлцсэн юм.