Зам, тээврийн яамны Төрийн нарийн бичгийн дарга С.Батболд Их Британи, Умард Ирландын нэгдсэн хаант улсын Британийн Экспортын санхүүжилтийн агентлагийн Бизнесийн удирдлагын ахлах мэргэжилтэн Крис Аллум, Кросс рэйл компанийн захирал Плд Дайсон тэргүүтэй төлөөлөгчдийг өнөөдөр хүлээн авч уулзлаа.

Хурлын эхэнд Төрийн нарийн бичгийн дарга С.Батболд төлөөлөгчдийг Монгол Улсын Эдийн засгийн форумд хүрэлцэн ирж оролцож байгаад талархал илэрхийлээд, хоёр улсын төмөр зам, хотын нийтийн тээврийн чиглэлээр яриа хэлэлцээр идэвхтэй явагдаж байгаад сэтгэл хангалуун байгаагаа онцоллоо.

Мөн “Улаанбаатар хотод тулгамдаад байгаа авто замын түгжрэлийг арилгахад чиглэгдсэн цогц бодлого, үйл ажиллагаанд багтсан нийтийн тээврийн томоохон төслүүд, түүний дотор их багтаамжийн зорчигчийн галт тэрэг буюу метро байгуулах болон хөнгөн галт тэргийг нэвтрүүлэх зэрэг төслүүдийг хэрэгжүүлэхэд Улаанбаатар хотын захиргаатай ойр нягт хамтран ажиллаж байгаа гэсэн мэдээлэл авсан. Хөнгөн галт тэрэг байгуулах төслийн асуудлыг манай яам хариуцан ажиллаж байна. Энэ төсөл дээр бид Британийн талтай хамтран ажиллах, мэдлэг туршлагаас судлах, бодитой хамтын ажиллагааг эхлүүлэх, мөн төслийн санхүүжилтийн боломжуудын талаар ярилцах сонирхолтой байна. Лондон хот бол дэлхийн том хотуудын нэг бөгөөд нийтийн тээврийг оновчтой сайн хөгжүүлсэн гэж үздэг. Ялангуяа Лондонгийн метрог бид сайн мэднэ. Манай яамны зүгээс Британийн талтай энэ чиглэлд хамтран ажиллахыг бүрэн дэмжиж байгаа” хэмээн онцлоод зам, тээврийн салбарт хэрэгжиж буй төслүүдээ танилцууллаа.

Хариуд нь Британийн Экспортын санхүүжилтийн агентлагийн Бизнесийн удирдлагын ахлах мэргэжилтэн Крис Аллум хэлэхдээ “Монгол Улсад хэрэгжүүлэх төслүүдийг санхүүжүүлэх, зээл олгох боломжуудын талаар манай хоёр тал олон удаа уулзалтууд хийж ярилцсан. Британийн экспортын санхүүжилтийн агентлагаас шаардлага хангасан төслүүдийг санхүүжилт авахад зээлийн баталгаа гаргахад бэлэн гэдэг байр суурийг илэрхийлж ирсэнд талархал илэрхийлье. Өмнө нь Пандрол бэхэлгээг худалдан авахад уг зээлийн баталгааг гаргуулах талаар уулзаж ярилцаж байсан. Одоо бид метро болон LRT төслүүдийг санхүүжүүлэхэд баталгаа гаргуулахад хамтран судалж ярилцахад бэлэн байна” гэдгээ илэрхийллээ.

Уулзалтын төгсгөлд манай хоёр орны хооронд дипломат харилцаа тогтоосноос 50 жил өнгөрч олон салбарт харилцаа, хамтын ажиллагаа өргөжин хөгжиж байгаа боловч зам, тээврийн салбарт төмөр замаас бусад салбарт зам, тээврийн салбарын хамтын ажиллагаа төдийлөн идэвхтэй бус байгаа тул хамтын ажиллагаагаа идэвхжүүлэх чиглэлээр ажиллах талаар санал солилцлоо.