Зам, тээврийн яамны 2025 оны эхний хагас жилийн тайлангийн хурал өнөөдөр /2022.07.09/ болов. Оны эхний хагас жилд зам, тээврийн салбарт хэд хэдэн бүтээн байгуулалтын ажлыг ашиглалтад хүлээж авч, зарим бүтээн байгуулалтын төслийг эхлүүлжээ. 

Хурлын эхэнд Зам, тээврийн сайд Б.Дэлгэрсайхан хэлсэн үгэндээ "Монгол Улсын урт хугацааны хөгжлийн бодлого “Алсын хараа-2050”, “Монгол Улсын бүсчилсэн хөгжлийн үзэл баримтлал”, “Шинэ сэргэлтийн бодлого” дунд хугацааны хөгжлийн хөтөлбөр Монгол Улсын Засгийн газрын 2024-2028 оны үйл ажиллагааны хөтөлбөрт зам, тээврийн салбар нь хөгжлийн тэргүүлэх салбаруудын нэг бөгөөд эдийн засгийн өсөлтийг дэмжигч, хөгжлийг хурдасгагч, бүс нутгийн интеграцид холбогч салбар мөн болохыг тодотгосон. Энэ бол та бүхний хүчин чармайлт, хичээл зүтгэлийн үр дүн юм" хэмээн онцлов.

Мөн зам, тээврийн яамны албан хаагчдыг хувь хүний хөгжил, цаг ашиглалтдаа тогтмол анхаарч, ёс зүйг эрхэмлэж, зам, тээврийн салбар цаашлаад улс орны хөгжлийн бодлогыг харж, санаачилгатай ажиллахыг уриалав.

Үүний дараа Хяналт, шинжилгээ, үнэлгээ, дотоод аудитын газрын дарга Х.Оюунтуяа хагас жилийн тайланг танилцуулав. Тэрбээр гүйцэтгэлийн төлөвлөгөөнд тусгагдсан 90 арга хэмжээний хэрэгжилтийн дундаж үнэлгээ 77.5 хувьтай байгааг онцлоод тайлант хугацаанд хийгдсэн онцлох ажлуудыг танилцуулав.

Тухайлбал, агаарын тээврийн салбарт 2025 оны 06 дугаар сарын 15-ны өдрийн байдлаар нийт 9,924 транзит зорчигч зорчсон нь 2024 оны мөн үеэс 45%-аар өссөн үзүүлэлттэй байна. Хэнтий аймагт Өндөрхаан хотод цагт 50 хүн нэвтрүүлэх хүчин чадал бүхий 3С ангиллын нисэх онгоцны буудлыг ашиглалтад оруулсан байна.

Төмөр замын салбарт “Гашуунсухайт-Ганцмод” хилийн боомтын барилгын ажлыг эхлүүлсэн байна. “Төмөр замын төв коридорыг иж бүрэн шинэчлэн хөгжүүлэх” төслийг хэрэгжүүлэх зорилгоор Монгол, Орос, Хятад улсын талууд өөрсдийн нутаг дэвсгэр дээр баригдах төмөр замын ТЭЗҮ-ийг боловсруулж, 3 тал тохиролцсон байна.

Автотээврийн салбарт 2025 оны 06 сарын урьдчилсан байдлаар Автотээврээр 40 сая тонн ачаа тээвэрлэсэн нь өмнөх оны мөн үес 3.5%-аар буурсан, 75 сая зорчигч тээвэрлэсэн нь өмнөх оны мөн үетэй харьцуулахад 2.6%-аар өссөн ба үүнээс нийслэлийн тээврээр 74 сая зорчигч зорчжээ.  Мөн Хавирга хилийн боомтод 4.7 тэрбум төгрөгийн өртөг бүхий ачаа тээврийн терминал барих ажлыг эхлүүлсэн байна.

Автозамын салбарт Улсын Их Хурлын 2020 оны “Бүсчилсэн хөгжлийн үзэл баримтлал” 64 дүгээр тогтоол, Монгол Улсын Засгийн газар 2024-2028 оны үйл ажиллагааны хөтөлбөрийн хүрээнд ЭРЭЭНЦАВ-БИЧИГТ гэсэн авто замын ШИНЭ КОРИДОР-ыг нэмж барихаар шийдвэрлэсний дагуу Сүхбаатар аймгийн төв Баруун-Урт хотыг Бичигт боомттой холбох “Баруун-Урт-Бичигт” чиглэлийн авто замын эхний үе шат 152 км хатуу хучилттай авто зам” төслийн ажлыг эхлүүлсэн байна.  Түүнчлэн Хилийн боомтуудыг хатуу хучилттай авто замаар холбох төслүүдийг үргэлжлүүлж, 2025 онд 477 км авто замыг ашиглалтад оруулахаар зам, барилгын ажлыг эхлүүлээд байна.

Үүний дараа Зам, тээврийн яамны Төрийн нарийн бичгийн дарга С.Батболд яамны төрийн албан хаагчдыг ёс зүйг эрхэмлэж ажиллахыг сануулаад, энэ сарын 18, 19-нд тохиож буй Автотээврийн түүхт 100 жилийн ойн хөтөлбөрийг танилцуулан, идэвхтэй ажиллахыг уриаллаа.

Хурлын төгсгөлд яамны нэр бүхий албан хаагчдыг төрийн одон, медалиар шагнав.