Өнөөдөр Монгол Улсын автотээврийн салбарынхан 100 жилийн амжилт, ололтоо дүгнэж, ирэх зууны хөгжлийг түүчээлэх их зорилгоо хамтдаа тодорхойлж байна.

Монгол Улсад автотээврийн салбар үүсэж хөгжсөний түүхт 100 жилийн ойд зориулсан баярын хурал, ёслол хүндэтгэлийн үйл ажиллагаагаа өнөөдөр Төрийн ордны Их Монгол танхимд баярын мэндчилгээтэй, шагналын хуртай өргөн дэлгэр зохион байгуулагдаж байна.

Хүндэтгэлийн үйл ажиллагаанд Монгол Улсын Ерөнхий сайд Г.Занданшатар, Монгол Улсын Ерөнхийлөгчийн Тамгын газрын дарга А.Үйлстөгөлдөр, Засгийн газрын гишүүн, Зам, тээврийн сайд Б.Дэлгэрсайхан, Зам, тээврийн яамны Төрийн нарийн бичгийн дарга С.Батболд болон Зам тээврийн яам, АТҮТ-ийн дарга удирдлагууд, гадаад дотоодын зочид төлөөлөгчид, автотээврийн салбарын ахмадууд, ажилтан алба хаагчид өргөн бүрэлдэхүүнтэй оролцож байна.

Баярын хуралд Ерөнхий сайд Г.Занданшатар мэндчилгээ дэвшүүллээ.

Мөн энэ үеэр Монгол Улсын Ерөнхийлөгчийн зарлигаар Автотээврийн үндэсний төв ТӨҮГ-ыг Хөдөлмөрийн гавьяаны улаан тугийн одонгоор шагнаж, захирал Б.Гүрсоронзонд гардуулан өглөө.

Үүний дараа Зам, тээврийн сайд Б.Дэлгэрсайхан мэндчилгээ дэвшүүллээ. Тэрбээр хэлсэн үгэндээ "Монголчууд бид Ардын хувьсгалаас өмнө ердийн хөсгөөр жин тээж, морин өртөөгөөр алба залгуулан өргөн уудам нутгийнхаа өнцөг булан бүрт хүрч үйлчилдэг байсан нүсэр ажлаа түргэн шуурхай, үр ашигтай Автотээврийн хэрэгслээр солиод 100 жилийн босгон дээр ирлээ.

• 1925 онд автотээврээр 400 мянган тонн ачаа тээвэрлэж байсан бол 2024 онд 85.2 сая тонн болж, 213 дахин нэмэгджээ.
• 1935 онд 800 мянган зорчигч тээвэрлэж байсан бол 2024 онд 145 сая зорчигч тээвэрлэсэн нь 181 дахин өссөн байна.
• 1929 онд 20 автомашинтай байсан бол 2024 онд 1’178’324 автомашин бүртгэгдсэн нь 59 мянга дахин өсчээ.

Шинжлэх ухааны ололт амжилт, техник технологийн үсрэнгүй хөгжлийн энэ цаг үед Та бүхэн баатарлаг замналтай ахмад үеийнхээ ололт амжилт, бүтээл зүтгэлийн түүхийг өртөөлөн, автотээврийн салбарт орчин үеийн дэвшилтэт техник, технологийг оновчтой нэвтрүүлж, эх орон, ард иргэддээ үйлчлэх үйлчилгээний чанар, хүртээмжийг нэмэгдүүлж, улам их амжилт гаргана гэдэгт итгэлтэй байна.

Улс эх орныхоо бүтэн байгуулалт, хөгжил дэвшил болон ард иргэдийнхээ тээврийн үйлчилгээг тасралтгүй, найдвартай, шуурхай үзүүлэх хариуцлагатай үүргээ нэр төртэй биелүүлж, автотээврийн салбарын шинэ зууны түүхийг бичилцэж буй Автотээврийн салбарын нийт хамт олон, тээвэрчиддээ гүн талархал илэрхийлье" хэмээн онцлов.