Монгол Улсад автотээврийн салбар үүсэж хөгжсөний түүхт 100 жилийн ой өнөөдөр тохиож байна. Энэ хүрээнд Зам, тээврийн яам, Автотээврийн үндэсний төв ТӨҮГ, Монголбанкны Эрдэнэсийн сан хамтран “Монгол Улсын автотээвэр 100 жил” сэдэвт дурсгалын шинэ зоосыг бүтээлээ.

Арга хэмжээг нээж Зам, тээврийн сайд Б.Дэлгэрсайхан хэлэхдээ “Монгол банкны Эрдэнэсийн сантай хамтран гаргаж буй энэхүү зоосны хувьд 1949 онд ардын аж ахуйтныг морин өртөөний албанаас чөлөөлж, авто өртөөгөөр сольсон түүхтэй холбоотой.

Морин өртөөнд агт нийлүүлэх алба гувчуур нь ард игэдэд ихээхэн дарамт учруулж байсан тул Бүгд Найрамдах Монгол Ард Улсын Сайд нарын Зөвлөл ба Монгол Ардын Xyвьсгалт Намын Төв Хорооноос 1949 оны долдугаар сарын 26-ны өдөр “Улсын өртөөг байгуулах тухай” дэлгэрэнгүй тогтоолыг баталж морин өртөөг авто өртөөгөөр солих шийдвэрийг гаргасан.

Уг тогтоолыг хэрэгжүүлж 1949 оны 10 дугаар сарын 20-ны өдөр 18 аймагт 110 ширхэг “ГАЗ-51” автомашиныг Сүхбаатарын талбайгаас хуваарилан олгож буй үйл явдлыг дурсгалын зоосонд дүрслэн үзүүлсэн.

Морин өртөөг халж авто өртөөгөөр гүйцэтгэх болсон нь Монгол Улсад хөдөө аж ахуйд нэгдэлжих, хоршоолох, атар газар эзэмших хөдөлгөөн өрнөж экспорт, импортын болон дотоодын ачаа тээвэрлэлт, зорчигчдын үйлчилгээнд чухал эргэлт гаргасан үйл явдал тул дурсгалын зоосонд дүрслэн үзүүлсэн болно” хэмээн онцоллоо.

Үүний дараа Монголбанкны Ерөнхийлөгч Б.Лхагважав мэндчилгээ дэвшүүллээ. Тэрбээр “Монгол Улсад автотээврийн салбар үүсэж хөгжсөний түүхт 100 жилийн ойгоор дурсгалын шинэ зоос гаргаж байгаадаа миний бие болон Монголбанкны зүгээс маш баяртай байна. Монголбанк 54 жилийн хугацаанд хүн төрөлхтний болон эх орныхоо түүхэн тэмдэглэлт ой, түүхт хүмүүс, соёлын өв, спортын амжилт, байгаль орчин, онцлог үйл явдал зэрэгт зориулан 700 гаруй дурсгалын зоосыг үйлдвэрлүүлэн гаргасан. Энэ удаад алтадсан мөнгөн дурсгалын зоосыг гаргаж байна. Энэхүү зоос нь 1 унци буюу 31.1 грамм жинтэй, 38.61 мл-ийн диаметрийн хэмжээтэй, орчин үеийн дэвшилтэт технологиор нэлээд товойлттой хийгдсэн” хэмээлээ.