БНХАУ-БЭЭЖИН: Монгол Улсын Засгийн газрын гишүүн, Зам, тээврийн сайд Б.Дэлгэрсайханаар ахлуулсан Ажлын хэсэг өнөөдөр (2025.07.08) Бээжин хотноо БНХАУ-ын “Хятадын төмөр замуудын корпораци” ХХК-ийн Намын хорооны орлогч дарга, Ерөнхий захирал Сун Сюдө болон холбогдох удирдах албан тушаалтнуудтай уулзаж, Монгол Улсын Засгийн газрын бодлогод тусгагдсан зорилтуудыг хэрэгжүүлэх хүрээнд хоёр улсын төмөр замын салбарт тулгамдаж буй зарим асуудлыг шийдвэрлэх тухай асуудлыг хэлэлцлээ.

БНХАУ-ын “Хятадын төмөр замуудын корпораци” ХХК-ийн Намын хорооны орлогч дарга, Ерөнхий захирал Сун Сюдө Монгол Улсын ЗТЯ-наас томилогдсон Ажлын хэсгийнхэн “Дэлхийн хурдны галт тэрэгний 12 дугаар их хурал”-д оролцохоор хүрэлцэн ирсэнд талархал илэрхийллээ. Монгол Улсын шинэ Засгийн газрын бүрэлдэхүүнд Зам, тээврийн сайд Б.Дэлгэрсайханыг дахин томилогдсонд баяр хүргэлээ.

Салбарын сайд Б.Дэлгэрсайхан энэхүү уулзалтаар хоёр улсын төрийн тэргүүн нарын уулзалтууд, өндөр хэмжээний уулзалтуудаар хил холболтыг ажлыг харилцан уялдаатайгаар төлөвлөн эхлүүлэх тухай асуудлыг олонтаа ярьсан. Үүний дагуу бид Гашуунсухайт-Ганцмод боомтын хил дамнасан гүүрэн байгууламжийн барилгын ажлыг хоёр талаас эхлүүлж, бодит ажил хэрэг болгож буйд талархлаа илэрхийллээ.

Мөн өнгөрсөн онд хоёр улсын хувьд Замын Үүд-Эрээн боомтын төмөр замын ачаа тээврийн хэмжээ нэмэгдсэн үзүүлэлттэй байгааг дурьдаад, цаашид Зүүнбаян-Ханги чиглэлийн төмөр замыг идэвхтэй ашиглаж, транзит ачаа, чингэлэг тээврийн хэмжээг нэмэгдүүлэх боломжтой гэсэн саналыг дэвшүүллээ.

Энэ хүрээнд мөн ЗамынҮүд-Эрээн боомтын нарийн царигийн 2 дахь гол замыг хил дээр холбох ажлыг эрчимжүүлж, хоногт солилцох галт тэрэгний тоог нэмэх, ачаа тээврийн хэмжээг нэмэгдүүлэх, Замын-Үүд боомтын нарийн царигийн өртөөний өргөтгөл хийж, ачааны терминал шинээр барих төсөлд “Хятадын төмөр замууд” корпорацийн зүгээс хөрөнгө оруулж хамтран ажиллах хүсэлтийг уламжиллаа.

Зорчигч тээврийн чиглэлд, Бээжин-Улаанбаатар чиглэлд галт тэрэг явж эхэлсэнтэйгээр холбогдуулан үнийн тарифт хөнгөлөлт үзүүлэх боломжийг судалж үзэх, ойрын хугацаанд шийдвэрлэж өгөх саналыг дэвшүүлэв.

”Хятадын төмөр замуудын корпораци” ХХК-ийн Ерөнхий захирал Сун Сюдөтэ “Монгол-Орос-Хятадын Эдийн засгийн коридор байгуулах хөтөлбөрийн хүрээнд гурван улс хамтран хэрэгжүүлэхээр тохирсон төслүүдийн нэг нь төмөр замын “Төв” эдийн засгийн коридорын төсөл юм. Энэ хүрээнд хоёр талын тээврийн салбар, хамтын ажиллагаанд түлхэц үзүүлэх зорилгоор дунд замын шинэчлэлийг идэвхтэй дэмжин ажиллах болно.

Хоёр улсын Засгийн газрын хэлэлцээрийн дагуу Шивээхүрэн, Сэхээ, Зүүнхатавч Бичигт, Ханги-Мандал боомтын хил дамнасан төмөр замын барилгын ажлыг шат дараатай эхлүүлэх ажилд анхаарал хандуулан ажиллахаа илэрхийллээ.

Мөн хоёр талын тээврийн салбар дахь хамтын ажиллагаанд түлхэц үзүүлэхэд энэхүү ажил хэрэгч уулзалт өндөр ач холбогдол өгч харилцан ойлголцол, зөвшилцөлийг бий болгож байгааг онцоллоо.

Уулзалтын төгсгөлд , Зам, тээврийн сайд Б.Дэлгэрсайхан БНХАУ-ын “Хятадын төмөр замуудын корпораци” ХХК-ийн удирдлагууд Монгол Улсын хөгжил дэвшилд анхаарал хандуулан ажилладагт талархал илэрхийлээд, хоёр улсын Засгийн газар, зам тээврийн салбар дахь харилцаа, хамтын ажиллагаа хурдны галт тэргийг нэвтрүүлэх, бэлтгэл ажлыг хангах, хамтран ажиллах чиглэлээр улам өргөжин хөгжинө гэдэгт итгэлтэй байгаагаа илэрхийлэв.

Уулзалтад БНХАУ-ын талаас:

”Хятадын төмөр замууд” корпорацийн Орлогч дарга Сун Сюдэ

”Хятадын төмөр замууд” корпорацийн Орлогч ерөнхий инженер бөгөөд Олон улсын хамтын ажиллагааны дарга Жу Гуо Жиан

Тамгын газрын дэд дарга Лю Хао

Хөгжил шинэчлэлийн газрын дэд дарга Лю Вэнсиэнш

Ачаа тээврийн газрын дарга У Жаосин

Олон улсын хамтын ажиллагааны дэд дарга Ван Гуажун

”Хятадын төмөр замууд” корпорацийн Олон улсын компанийн (CRIC) дарга Жүн Шэн Гүи нар оролцов.