Иргэний нисэхийн ерөнхий газрын дарга асан, Монгол Улсын гавьяат эдийн засагч, иргэний нисэхийн салбарын гарамгай удирдагч Манжийн Дагва нь 2025 оны долдугаар сарын 22-ны өдөр таалал төгсөж, гэр бүл, найз нөхөд, хамт олон бидэнд нөхөж баршгүй хүнд гарз тохиолоо.

М.Дагва нь 1953 онд Говь-Алтай аймгийн Дарив суманд төрж, 1972 онд Говь-Алтай аймгийн Алтай хотын 10 жилийн дунд сургууль, 1977 онд ЗХУ-ын (хуучнаар) Москва хотын Инженер эдийн засгийн дээд сургууль, 1986 онд Намын дээд сургуулийг тус тус төгссөн, агаарын тээврийн инженер-эдийн засагч мэргэжилтэй, улс төрийн дээд боловсролтой Иргэний нисэхийн салбарын чадварлаг удирдагч, манлайлагч байсан юм. Тэрбээр:

• 1977 оноос Иргэний агаарын тээврийг удирдах ерөнхий газрын эдийн засагч, төлөвлөгч-эдийн засагч,
• 1980-1987 онд Төлөвлөгөө эдийн засгийн хэлтсийн дарга,
• 1987-1989 онд Москва хот дахь МИАТ нэгтгэлийн Ерөнхий төлөөлөгчийн газарт Ерөнхий төлөөлөгч,
• 1989-1992 онд МИАТ нэгтгэлийн орлогч захирал,
• 1992-1993 онд Зам, тээврийн ерөнхий газрын харьяа Агаарын харилцааны газрын дарга,
• 1993-1996 онд Иргэний агаарын тээврийг удирдах ерөнхий газрын Тэргүүн дэд захирал,
• 1998-2006 онд Иргэний нисэхийн ерөнхий газрын даргаaр ажиллаж байв.   

М.Дагвын тус байгууллагын удирдлагаар ажиллах хугацаанд иргэний нисэхийн салбарын хувьд томоохон төслүүд хэрэгжсэн бөгөөд түүний санаачлан хэрэгжүүлсэн буюу удирдлагаар хангаж ажилласан төслүүдийг дурдвал 1993-1998 онуудад Монгол Улсад гадаадын зээл, тусламжаар хэрэгжсэн хамгийн анхны томоохон төсөл болох Азийн хөгжлийн банкны санхүүжилтээр Улаанбаатарын нисэх буудлын өргөтгөлийн төсөл, 1990-1992 онуудад хэрэгжсэн техник туслалцааны Иргэний нисэхийн салбарыг хөгжүүлэх судалгаа ба Үндэсний агаарын Аюулгүй байдлын төлөвлөгөөг боловсруулах төсөл, 1995-2000 онуудад хэрэгжсэн мөн Агаарын навигацийг хөгжүүлэх төсөл,  2002-2003 онуудад Европын сэргээн босголт, хөгжлийн банкны санхүүжилтээр Иргэний нисэхийн Мастер төлөвлөгөө боловсруулах зэрэг төслүүдийг хэрэгжүүлснээр Монгол Улсын нутаг дэвсгэр дээгүүр нисэж өнгөрөх өнгөрөлтийн нислэгийн тоо үлэмж хэмжээгээр нэмэгдсэн юм.

М.Дагвын эгэл даруу, ажилч хичээнгүй, шулуун шударга, нөхөрсөг, манлайлагч, зарчимч, бүтээлч үйл хэрэг, гэгээн дүр нь бидний сэтгэл зүрхэнд мөнх хадгалагдан үлдлээ. 

Монгол Улсын Иргэний нисэхийн салбарыг хөгжүүлэхэд оруулсан Таны хувь нэмэр, үйл хэргийг салбарын хамт олон бид үеийн үед хүндэтгэн дурсах болно. 

Хань, гэр бүл, үр хүүхэд, төрөл төрөгсдөд нь гүн эмгэнэл илэрхийлье. 

ЗАМ, ТЭЭВРИЙН ЯАМ