Өнөөдөр (2025.07.29) Монгол Улсын иргэний агаарын тээврийн түүхэнд нэгэн шинэ хуудсыг нээж байна.

Монгол Улсын Засгийн газрын үйл ажиллагааны хөтөлбөрт тусгагдсан агаарын тээврийг либералчлах бодлогын хүрээнд Хөвсгөл аймгийн Мөрөнгийн нисэх буудалд өнөөдөр буюу 2025 оны долдугаар сарын 29-ний өдөр Үндэсний агаарын тээвэрлэгч "Hunnu Air" компани “ЧОНЖУ – МӨРӨН” чиглэлийн олон улсын анхны нислэгээ үйлдлээ.

Зам, тээврийн яамнаас цаашид аймаг, орон нутгийн нисэх буудлуудын ангилалыг дээшлүүлж, олон улсын 4С ангилалд хүргэх, агаарын тээврийн сүлжээг шат дараатай өргөжүүлэх зорилт дэвшүүлэн ажиллаж буй нь зөвхөн тээвэр, дэд бүтцийн салбарын хөгжил бус, Монгол Улсын аялал жуулчлал бүс нутгийн хөгжилд эдийн засгийн томоохон хөшүүрэг болох юм. Тухайлбал, өнөөдрөөс эхлэн Мөрөнгийн нисэх буудалд орон нутгийн хуваарьт нислэг газардахаас гадна ОХУ, БНХАУ, Япон, БНСУ, Зүүн өмнөд азиас олон улсынжуулчны захиалгат болон хуваарьт шууд нислэгийг хүлээн авах боломж бүрдэх юм.

Агаарын тээврийн энэхүү хөгжил нь аялал жуулчлалын салбарт үнэтэй хувь нэмэр оруулна хэмээн экспертүүд үзэж байна. Учир нь Улаанбаатар хотод бүх нислэг төвлөрөхгүй орон нутагт шууд очиж буух нь олон талын давуу талтай юм.

Энэ удаагийн "Чонжу-Мөрөн" чиглэлийн захиалгат нислэгийг амжилттай гүйцэтгэснээр гадаадын жуулчид зардал болон цагаа хэмнэж Улаанбаатар хотоор дамжихгүйгээр шууд Хөвсгөл аймгийг зорих маш том боломж нээгдэж байна.

"Хүннү Эйр" компани тус нислэгийг 98 хүний суудалтай "Embraer-190" агаарын хөлгөөр үйлдсэн бөгөөд хоёр улсыг холбосон энэ нислэг ердөө 4 цаг 10 минут үргэлжилнэ.