ЗТЯ-ны Төрийн нарийн бичгийн дарга С.Батболд өнөөдөр (2025.07.29) Япон улсын Газар, дэд бүтэц, тээврийн яам болон Япон улсын Олон Улсын Хамтын Ажиллагааны Байгууллага "ЖАЙКА"-гийн төлөөлөгчдийг хүлээн авч уулзлаа.

Талууд уулзалтаар “ЧИНГИС ХААН” олон улсын нисэх буудлыг Япон улсын Засгийн газрын хөнгөлөлттэй зээлээр өргөтгөх болсонтой холбогдуулан төсөл хэрэгжүүлэгч талтай барилга байгууламжийн өргөтгөл, ТЭЗҮ буюу урьдчилсан судалгаанд тусгах нэмэлт санал хүсэлтийн талаар харилцан санал солилцлоо.

Энэ удаагийн уулзалтад Япон улсын Газар, дэд бүтэц, тээврийн яам, “Шинэ Кансай” Олон улсын нисэх онгоцны буудлын удирдах албан тушаалтнуудаас бүрдсэн “Дотоодын дэмжих хороо” буюу дэх “Чингис хаан” олон улсын шинэ нисэх буудлын өргөтгөлд хяналт тавьж, хамтран ажиллах төлөөлөгчид, иргэний нисэхийн салбарын суурь судалгааны мэргэжилтнүүд, төлөвлөлтийн багийнхан Монгол Улсад хүрэлцэн ирж, Зам, тээврийн яамны удирдлагуудтай санал солилцож буйгаараа онцлогтой.

Уулзалтаар Япон улсын “Дотоодын дэмжих хороо”-ны төлөөлөгчид Монгол Улсад энэ сарын 27-нд хүрэлцэн ирсэн бөгөөд "Чингис Хаан" нисэх буудлын үйл ажиллагаа, барилга байгууламжийн бүтэц зохион байгуулалт, нисэх буудлын үйлчилгээ, ачаалал, зорчигчдын тоон мэдээлэл,  оргил цагийн ачаалалтай биечлэн танилцсанаа дуулгалаа.

Мөн ТЭЗҮ хийж буй төслийн багийнхантай уулзаж, одоогийн тулгамдаж буй асуудал, нисэх буудлыг өргөтгөх ажилд Монголын талаас тавьж буй санал хүсэлтийг сонсож, холбогдох мэдээллийг хүлээн авсан гэдгээ хэллээ. 

ЗТЯ-ны Төрийн нарийн бичгийн дарга С.Батболд Япон улсын төлөөлөгчдөд Монгол Улсын Засгийн газар, Зам, тээврийн яамнаас агаарын тээврийн либералчлах бодлого хэрэгжүүлэх хүрээнд  манай улсын агаарын тээврийн зах зээлд гадаад дотоод нислэгийн чиглэл, тоо, давтамж эрс нэмэгдэж байгааг танилцууллаа.

Мөн Монгол Улсын Засгийн газраас 2023-2028 оныг “Монголд зочлох жил” болгон зарласан бөгөөд энэ ажлын хүрээнд манай улсыг зорин ирэх нислэг болон жуулчдын тоо эрс нэмэгдэж байгаатай холбоотойгоор “Чингис хаан” Олон улсын нисэх буудлыг өргөтгөх, төслийн ТЭЗҮ судалгааг богино хугацаанд хариуцлагатай чанартай хийх, уг судалгаанд ЗТЯ болон иргэний нисэхийн салбарын мэргэжилтнүүдийн санал хүсэлтийг тусгах, төслийн барилгын ажлыг эрт эхлүүлж, аль болох төлөвлөсөн хугацаанаас өмнө ашиглалтад оруулах хэрэгцээ шаардлагатай байгааг онцоллоо.

Уулзалтын төгсгөлд, Япон улс нь Монгол Улсын бүхий л салбарт, тэр дундаа дэд бүтэц, тээврийн салбарт тууштай дэмжлэг үзүүлж, хамтран ажиллаж ирсэнд талархлаа илэрхийлээд,  “Чингис Хаан” нисэх буудлыг өргөтгөх энэхүү төсөл нь хоёр орны олон талт харилцаа, хамтын ажиллагааг улам өргөжүүлэн хөгжүүлэхэд чухал нөлөө үзүүлнэ гэдэгт итгэж байгаагаа илэрхийллээ. Мөн энэ хүрээнд идэвхтэй тууштай хамтран ажиллахаа  тэмдэглэв.