Монгол Улсын Засгийн газрын гишүүн, Зам, тээврийн сайд Б.Дэлгэрсайхан өнөөдөр (2025.08.01) Монгол Улсаас Тайландын Хаант Улсад суугаа өргөмжит консул П.Натапонг тэргүүтэй төлөөлөгчдийг хүлээн авч уулзан хамтын ажиллагааны талаар санал солилцлоо.

Уулзалтын эхэнд сайд Б.Дэлгэрсайхан Монгол улсаас Тайландын хаант улсад суух Өргөмжит Консулаар томилогдон ажиллаж байгаа ноён Натапонг болон Тайландын бизнесийн төлөөлөгчдийг манай улсад зочлон ажиллаж байгаа явдалд талархлаа илэрхийллээ.

Тайланд улстай манай улс иргэний нисэхийн салбарт 1994 онд Агаарын харилцааны хэлэлцээр байгуулан шууд нислэг үйлдэх боломж бүрдэж, Монголын талаас “МИАТ” ТӨХК, Тайландын талаас “АэроТай” компани Улаанбаатар-Бангкок чиглэлд тус тус хуваарьт нислэг үйлдэх агаарын тээвэрлэгчээр томилогдсон. Түүнчлэн захиалгат нислэгээр одоо тус улсын Бангкок, Паттая, Пукет зэрэг хот руу “МИАТ” ТӨХК, “Хүннү Эйр” ХХК нь Улаанбаатараас шууд нислэг үйлддэг гэдгийг хэллээ.

Мөн Тайландын Иргэний нисэхийн сургалтын төв нь 1999 оноос хойш Монголын 80 орчим нислэгийн хөдөлгөөний удирдагчийг бэлдсэн бөгөөд давхардсан тоогоор 200 гаруй нислэгийн хөдөлгөөний удирдагчийг давтан сургалтад хамруулсан байна. Цаашид энэ чиглэлээр үргэлжлүүлэн хамтран ажиллах сонирхолтой байгаагаа уламжиллаа.

Салбарын сайдын зүгээс Монгол Улсын Засгийн газар, Зам, тээврийн яамнаас  орон нутгийн нисэх буудлуудыг олон улсын 4С ангиллын стандартад нийцүүлэн шинэчилж, орон нутгаас гадаад болон дотоод чиглэлийн нислэгийн чадамжийг нэмэгдүүлэх замаар бүс нутгийн эдийн засаг, аялал жуулчлал, тээвэр логистикийн хөгжилд хувь нэмэр оруулах бодлого чиглэлийг баримтлан ажиллаж байгааг танилцууллаа.

Энэ хүрээнд Хөвсгөл аймаг дахь “Мөрөн”, Өмнөговь аймаг дахь “Гурвансайхан”, Ховд аймаг дахь “Ховд”, Дорнод аймаг дахь “Чойбалсан” орон нутгийн нисэх буудлуудыг хөгжүүлэх, энэ чиглэлд хөрөнгө оруулах боломжууд, мөн хоёр улсын хоорон дахь нислэгийн тоо давтамжийг нэмэгдүүлэх тухай асуудлаар санал солилцлоо. 

Монгол Улсаас Тайландын Хаант Улсад суугаа өргөмжит консул П.Натапонг “Юуны өмнө биднийг хүлээн авч уулзаж байгаад талархлаа илэрхийлье” гээд хоёр улсын иргэний нисэхийн салбар, аялал жуулчлал, эдийн засаг, эрүүл мэнд зэрэг олон чиглэлд хамтран ажиллах бүрэн боломжтойг тэмдэглэлээ. Мөн зарим саналыг Тайланд улсын холбогдох байгууллагуудад уламжилж, хамтран ажиллах чиглэлээр санал хүргүүлнэ гэдгээ илэрхийллээ. 

Уулзалтын төгсгөлд Зам, тээврийн сайд Б.Дэлгэрсайхан болон Монгол Улсаас Тайландын Хаант Улсад суугаа өргөмжит консул П.Натапонг нар Монгол, Тайланд хоёр улсын хамтын ажиллагааг өргөжүүлж, тээврийн салбарт тэр дундаа иргэний нисэхийн салбарт олон чиглэлд хамтран ажиллахаа илэрхийлэв.