Монгол Улсын Засгийн газрын 2025 оны хяналт шалгалтын төлөвлөгөө, Зам, тээврийн яамны 2025 оны гүйцэтгэлийн төлөвлөгөөний 12.5, Салбарын газрын дарга, улсын ерөнхий байцаагчийн баталсан 04/02, 04/03, 04/04 дугаартай удирдамжийн дагуу улс хооронд, хот хооронд, орон нутгийн зорчигч тээврийн үйлчилгээ эрхлэгч 17 аж ахуйн нэгж, байгууллагын автотээврийн хэрэгслийн ашиглалт, 63 автотээврийн техникийн бүрэн бүтэн байдалд хяналт шалгалтыг хийж гүйцэтгэлээ.

Шалгалтаар зорчигчийг орон нутгийн нийтийн зорчигч тээврийн үйлчилгээг тусгай зөвшөөрөлгүйгээр эрхэлсэн, тээвэрлэлтийн нөхцөл, техникийн шаардлага хангаагүй тээврийн хэрэгслээр тээвэрлэсэн, стандартын шаардлага хангасан техникийн оношилгоо, үйлчилгээ, засвар болон автомашин угаалгын газаргүй, тээврийн хэрэгсэлд хийх техникийн үйлчилгээний хугацааг явсан бодит гүйлт эсвэл төлөвлөгөөт гүйлттэй уялдуулан тогтоогоогүй, автомашин ашиглалттай холбоотой асуудлыг хянан шийдвэрлэж байх үүрэг бүхий техникийн комисс буюу зөвлөлийг  байгуулаагүй, мэргэжлийн болон мэргэшсэн хүний нөөцгүй гэсэн зөрчил дутагдлыг илрүүллээ.

Мөн гэрээ байгуулсан байгууллагатай тохиролцсон цагийн хуваарийг баримтлаагүй, бага насны хүүхдийг тээвэрлэхдээ хүүхдийн суудлыг ашиглаагүй, үйлчилгээний явцад зорчигчдод тээвэрлэлтийн талаарх болон эрх, үүрэг, аюул осолгүй тээвэрлэлтэд оролцох талаар шаардлагатай мэдээллээр хангаагүй, техникийн саатал гарсан тохиолдолд зорчигчийг шилжүүлэн суулгах, техникийн түргэн тусламж үзүүлэх яаралтай арга хэмжээг зохион байгуулаагүй, жолоочийг жил бүр эрүүл мэндийн гүнзгийрүүлсэн үзлэгт бүрэн хамруулаагүй зэрэг нийтлэг зөрчил дутагдал илэрсэн болно.  

Шалгалтын явцад 96 зөрчлийг илрүүлж, мэргэжил арга зүйн зөвлөгөө өгч зөрчлийг арилгуулахаар 91 заалт бүхий 7 улсын ахлах байцаагчийн албан шаардлагыг хүргүүлж, биелэлтэд хяналт тавьж, зөрчил гаргасан 5 аж ахуйн нэгж, байгууллагад 6500.0 мян.төгрөгийн шийтгэлийн арга хэмжээг авч барагдууллаа.

Орон нутгийн нийтийн зорчигч тээврийн үйлчилгээг эрхлэхдээ тусгай зөвшөөрөлгүйгээр эрхэлсэн Булган сумын “Тохижилт үйлчилгээний анги” ХХК, “Булган жолоо” ХХК, “Залман хангай хоршоо”, Орхон аймгийн “Хот тохижуулах газар” УТҮГ, “ББ-ОД” ХХК, “Эрдэнэт арслан” ХХК, “Автомастер төв” ХХК, “Даланзадгад зорчигч тээвэр” ОНӨААТҮГ зэрэг 8 аж ахуйн нэгж, байгууллагын тээвэрлэлтийн үйл ажиллагааг зөрчлийг арилгах хүртэл түр зогсоох тухай улсын ахлах байцаагчийн актыг гарган хүргүүллээ.  “Даланзадгад зорчигч тээвэр” ОНӨААТҮГ тусгай зөвшөөрлөө авсан тул актыг сэргээсэн болно.