ЭМГЭНЭЛ

ЛУВСАНГИЙН ГУНГАА (1953-2025)

Монгол Улсын Хөдөлмөрийн баатар, Монгол Улсын Гавьяат тээвэрчин Лувсангийн Гунгаа нь 2025 оны 08 дугаар сарын 14-ний өдөр таалал төгссөнд гэр бүл, үр хүүхэд, төрөл төрөгсдөд нь гүн эмгэнэл илэрхийлье.

Л.Гунгаа нь  1953 онд Өмнөговь аймгийн Ханхонгор суманд малчны гэр бүлд төрж, өссөн  бөгөөд 1968 онд Өмнөговь аймгийн Даланзадгад сумын дунд сургууль, 1968-1970 онд Налайхын Техник мэргэжлийн сургуулийг тус тус суралцаж төгссөн байна.

Тэрээр 1971-1974 онд хугацаат цэргийн албыг хааж ирснийхээ дараа 1974 оноос Өмнөговь аймгийн Усны аж ахуйн удирдах газарт жолоочоор ажиллаж, ажлын гараагаа эхлүүлснээс хойш тээврийн жолоочоор тасралтгүй 40 жил ажиллажээ.  

Монгол Улсын Гавьяат тээвэрчин Л.Гунгаа нь 1977 оноос Тээврийн яамны харьяа Автотээврийн 32 дугаар баазад ачаа тээврийн хэсгийн жолоочоор ажилд орж, Монгол Улсын тээврийн салбар зах зээлд шилжсэн 1993 он хүртэлх хугацаанд ажиллаж байлаа.  Түүнээс хойш 1993-2013 он хүртэл хувийн тээврийн хэрэгслээр ачаа тээврийн ажил үйлчилгээг эрхэлж байгаад өндөр насны тэтгэвэрт гарчээ.  

Тэрээр Тээврийн яамны харьяа Автотээврийн 32 дугаар баазад жолоочоор ажиллах хугацаандаа 807,1 мянган км замыг туулж, 21699,7 тонн ачаа тээвэрлэж, 9778,9 мянган тн.км ажил гүйцэтгэж, нэг жолоочийн хөдөлмөрийн бүтээмжийг 2.5 дахин нэмэгдүүлж, тухайн үеийн тооцооллоор 32 жил 8 сарын ажлыг гүйцэтгэн онцгой амжилт гаргаж байсан нь манай автотээврийн салбарын тэргүүний, үлгэр жишээч тээвэрчдийн нэг байлаа.

Монгол Улсын Хөдөлмөрийн баатар Самбуу-Ёндонгийн “Тээврийн замд нэргүй саатал гаргадаггүй” туршлагыг ажилдаа бүрэн нэвтрүүлж, өөрийн хариуцсан тээврийн хэрэгслийн засвар үйлчилгээг тогтмол хийж, ачаа тээврийн ажил үйлчилгээг тасралтгүй гүйцэтгэж чадснаар 1978 онд хот хоорондын ачаа тээврийн “Улсын аварга тээвэрчин”, 1982 онд хос чиргүүлтэй ЗИЛ130 автомашинаар 2020 тонн ачаа тээвэрлэж 1040,2 мянган тн.км ажил, 1990 онд “МАЗ5335” маркийн автомашинаар 1610 тонн ачаа тээвэрлэж 893,5 мянган тн.км ажлыг тус тус гүйцэтгэснээр “Улсын хошой аварга тээвэрчин” болсон юм. Үүнээс гадна тэрээр Автотээврийн 32 дугаар баазын 4 удаагийн аварга, улс ардын аж ахуйн соёлыг хөгжүүлэх VI, VII, VIII таван жилийн гавшгайч болж байв.  

Түүний үйл хэрэг, хөдөлмөрийг төр засгаас өндрөөр үнэлж, Монгол Улсад автотээврийн салбар үүсэж хөгжсөний 100 жилийн ойг тохиолдуулан 2025 оны 07 дугаар сарын 08-ны өдөр Монгол Улсын Хөдөлмөрийн баатар цол, 2016 онд Монгол Улсын Гавьяат тээвэрчин цол, 1991 онд Хөдөлмөрийн гавьяаны улаан тугийн одон, БНМАУ-ын Тээврийн яамны “Онц тээвэрчин”, “Хүндэт жуух бичиг”, БНМАУ-ын Засгийн газрын “Хүндэт жуух”, автотээврийн салбарын 90, 95, 100 жилийн ойн медалиар тус тус шагнасан юм.

Талийгаачийн хөдөлмөрч, хичээнгүй, нөхөрсөг, төлөв даруу, хүнлэг зан чанар бидний сэтгэл зүрхэнд үүрд хоногшин үлдэх болно. Гэр бүл, үр хүүхэд, төрөл төрөгсөд, найз нөхөд, хамт олон, шавь нарт нь гүн эмгэнэл илэрхийлье.

МОНГОЛ УЛСЫН ЗАСГИЙН ГАЗАР

ЗАМ, ТЭЭВРИЙН ЯАМ

АВТОТЭЭВРИЙН 32 ДУГААР БААЗЫН ХАМТ ОЛОН