ЭМГЭНЭЛ

ДАМБЫН ТУЯА

1941-2025

Авто тээврийн салбарын ахмад зүтгэлтэн,  Монгол Улсын Гавьяат Тээвэрчин, Дамбын Туяа нь 2025 оны наймдугаар сарын 19-ний өдөр зуурдаар таалал төгсөж бид бүхэнд нөхөж барашгүй хүнд гарз тохиолоо.

Д.Туяа нь эх орныхоо авто тээврийн салбарын хөгжилд өөрийн амьдрал, хүч хөдөлмөрөө зориулж манлайлан явсан авто тээврийн салбарт тасралтгүй 53 жил ажилласан анхдагчдын нэг байлаа.

Тэрээр 1941 онд Завхан аймгийн Сант Маргад суманд төрж, Төв аймгийн 10 жилийн дунд сургууль төгсөж, Улаанбаатар хотын Полетехникумын тээвэр ашиглалтын ангид суралцаж төгсөөд, Төв аймгийн 13-р баазад хувиарлагдаж Тээвэр холбооны яамны харьяа Авто тээврийн төв диспечерийн удирдах газарт шуудан тээврийн диспечер, Ачаа тээврийн удирдах газарт диспечер улсын байцаагч, Тээврийн яамны төв диспечрийн удирдах газрын харьяа 22-ын товчооны дарга, Авто тээврийн хяналтын улсын байцаагч, Дорноговь аймгийн Замын үүдийн Товчооны дарга, Дорноговь аймгийн Тээвэр үйлчилгээний төвийн дарга, Дорнод аймгийн АйСВН ххк-д захирал, Тээвэр үйлчилгээний төвийн Дорнод салбарын дарга зэрэг албан тушаалд тасралтгүй хөдөлмөрлөн, Монгол улсын авто тээврийн салбарыг хөгжүүлэх, шинэ үеийн тээврийн салбарын мэргэжилтнүүдийг бэлтгэхэд өөрийн оюун ухаан, хүч хөдөлмөрөө харамгүй зориулсан шилдэг удирдагч байлаа.

Д.Туяа нь Монгол улсын авто тээврийн салбарын хөгжлийг шинэ шатанд гаргах олон ажилд  үнэтэй хувь нэмэр оруулсан бөгөөд түүний удирдлаган дор Замын үүдийн боомтоор Монгол, Хятад хоёр улсын хооронд анхны ачаа тээвэр, зорчигч тээвэрлэлтийг амжилттай зохион байгуулах ажлын суурийг тавьж эхлүүлсэн нь өдгөө ч улам өргөжин хөгжсөөр байна.

Тэрээр эх орондоо ажил хөдөлмөртөө үнэнчээр зүтгэж, хөдөлмөрийн гараагаа эхэлсэн цагаасаа эхлэн салбартаа үр бүтээлтэй, тууштай уйгагүй хөдөлмөрлөж, авто тээврийн салбарынхаа хөгжил дэвшилд үнэтэй хувь нэмэр оруулсан гавьяатай нэгэн байв.

Түүний  авто тээврийн салбарын хөгжилд хийж бүтээсэн  олон сайхан ажлыг нь Монгол улсын төр засаг өндөрөөр үнэлж:

• 1975-1990 онуудад Улсын ардын аж ахуй соёлыг хөгжүүлэх 5,6,7,8-р 5 жилийн гавшгайч
• 1991 онд Тээврийн яамны “Онц тээвэрчин”  цол тэмдэг
• Монгол улсын ардын хувьсгалын 60,70,80,90,100 жилийн ойн медаль
• Авто тээврийн байгууллагын 50,60,70,80,90,100 жилийн ойн медаль
• 1995 онд Монгол улсын хөдөлмөрийн хүндэт медаль
• 2006 онд Алтан гадас одон
• 2015 онд Монгол Улсын Хөдөлмөрийн гавьяаны улаан тугийн одон
• 2017 Зам тээвэр хөгжлийн яамны Авто тээврийн тэргүүний ажилтан
• 2018 онд Авто тээврийн холбооны “Ахмад тээвэрчин” цол тэмдэг
• 2019 онд Авто тээврийн байгууллагын “Манлай тээвэрчин” цол тэмдэг
• 2021 онд Монгол улсын “Гавьяат тээвэрчин” цол тэмдэг алдаршуулан шагнасан юм.

Түүний ажилч хичээнгүй, шударга, манлайлагч зан, Монголын авто тээврийн салбарын хөгжилд оруулсан хувь нэмэр, хийж бүтээсэн ажил үйлс бүхэн нь  мөнхөд дурсагдан үлдэх болно.

Монголын авто тээврийн салбарын нийт ажилтан, алба хаагчдын нэрийн өмнөөс түүний гэр бүл, үр хүүхэд, төрөл төрөгсдөд нь гүн эмгэнэл илэрхийлье.