Зам, тээврийн сайд Б.Дэлгэрсайхан БНХАУ-ын Бээжин хотод ажиллах үеэр 2025 оны есдүгээр сарын 2-ны өдөр ОХУ-ын Тээврийн сайд А.С.Никитин, Орлогч сайд бөгөөд Төрийн нарийн бичгийн дарга Д.С.Зверев нартай уулзлаа.

ОХУ-ын Тээврийн сайд А.С.Никитин 2025 оны 7 дугаар сард энэхүү албан тушаалд томилогдсон бөгөөд Зам, тээврийн сайд Б.Дэлгэрсайхан түүнд ОХУ-ын Тээврийн сайдаар томилогдсонд баяр хүргэж ажлын амжилт хүслээ.

Сайд нар хоёр улсын харилцаа, хамтын ажиллагаанд чухал байр суурийг эзэлж буй тээврийн салбарын талаар харилцан санал солилцож тулгамдаж буй асуудлуудыг шийдвэрлэх талаар дэлгэрэнгүй ярилцлаа.

Зам, тээврийн сайд Б.Дэлгэрсайхан Монгол Улсын Төмөр замын тээврийн тухай шинэчилсэн хуулийн дагуу байгуулагдсан Засгийн газрын хэрэгжүүлэгч агентлаг-Төмөр замын газрыг ОХУ-ын Төмөр замын агентлаг болох “Росжелдор”-ын хамтын ажиллагааг өргөжүүлэх ажлын төлөвлөгөөний дагуу хоёр улсын төмөр замын асуудал эрхэлсэн агентлагуудын хооронд хамтын ажиллагааны санамж бичиг байгуулах, Монгол Оросын хувь нийлүүлсэн төмөр зам болох “Улаанбаатар төмөр зам” нийгэмлэгийн үйл ажиллагаа, хамтран хэрэгжүүлж буй ажлын талаар санал бодлоо илэрхийлж, Монгол-Орос-Хятад гурван улсын “Эдийн засгийн коридор байгуулах хөтөлбөр”-т багтсан төмөр замын “Төв” коридорыг шинэчлэх хамтарсан ТЭЗҮ-ийг нэгтгэх, Монгол Улсын Засгийн газрын шийдвэрээр баригдаж буй шинэ төмөр замын дэд бүтэц  болох “Багахангай-Хөшигийн хөндий”чиглэлийн төмөр замын төслийн хэрэгжилтийн талаар мэдээлэл өгч байр сууриа илэрхийлэв.

Тэрбээр Багахангай-Хөшигийн хөндий салбар төмөр замын манай улсад үзүүлэх нийгмийн ач холбогдол, Улаанбаатар хотод тулгамдаад буй олон хүндрэлтэй асуудлыг шийдвэрлэхэд чухал үүрэгтэй төсөл болохыг тайлбарлаж танилцууллаа.

Мөн энэхүү төслийг богино хугацаанд хэрэгжүүлж дуусгахад тус төмөр замын дэд бүтцийг  Монгол Оросын хувь нийлүүлсэн төмөр замын дэд бүтэцтэй Улаанбаатар хотын хойд талд холбоход хувь нийлүүсэн нийгэмлэгийн Орос талын төлөөлөл болох Оросын талын дэмжлэг чухал байгааг онцолж энэ асуудлыг шуурхай шийдэхэд ОХУ-ын Тээврийн сайдын зүгээс дэмжиж ажиллахыг хүсэв.

Мөн сайд Б.Дэлгэрсайхан Монгол, Орос, Хятад гурван улсыг холбосон Монгол Улсын нутгаар дайрах шинэ төмөр замын Зүүн коридорын төслийн талаар хөндөж энэ төслийг хэрэгжүүлэхэд ОХУ-ын талтай ойр хамтран ажиллах, Эрээнцав-Чойбалсан хэсгийн одоо байгаа төмөр замын дэд бүтцийг засаж шинэчлэх, БНХАУ-ын талтай хамтарсан гурван талт уулзалтыг хийж, энэ төслийн талаар хамтран ажиллах саналыг дэвшүүлэв.

Сайдын зүгээс авто тээврээр хийгдэж буй тээвэрлэлт, ялангуяа дамжин өнгөрөх тээвэрлэлт саадгүй явагдаж байгаа болон нислэгийн үйл ажиллагааг өргөжүүлэх боломжуудын талаар саналаа илэрхийлэв.

ОХУ-ын Тээврийн сайд А.С. Никитин Зам, тээврийн сайд Б.Дэлгэрсайхантай уулзаж танилцсандаа баяртай байгааг илэрхийлээд хөрш орныхоо хамтын ажиллагааг чухалчилж үзэж байгаагаа тэмдэглэв.

Мөн ОХУ-ын Засгийн газраас Горноалтайск мужид Монгол Улсын хилтэй холбогдож буй Чуйский тракт хэсгийн авто замыг шинэчлэн сайжруулах санхүүжилтийг шийдвэрлэсэн бөгөөд ирэх жилээс зам барилгын ажлууд эхлэх болсон тухай эхлээд танилцуулав.

Ингэснээр уг авто замын хүчин чадал нэмэгдэж, хоёр талын худалдаа, тээврийг дэмжинэ гэдгийг онцлов.

Зам, тээврийн сайд Б.Дэлгэрсайханы зүгээс хөндөж ярьсан асуудлууд, ялангуяа Багахангай-Хөшигийн хөндий салбар төмөр замын нийгмийн ач холбогдлын талаар сайн ойлгож байгааг хэлээд, ОХУ-ын Тээврийн яамны харьяа холбогдох мэргэжлийн байгуулагуудад яаралтай судалж танилцуулахыг үүрэг болгохоо хэлэв.

Түүнчлэн Монгол Улсын зүүн бүсийн төмөр замын төслийг Оросын тал анхаарч сонирхож байгаа бөгөөд Хятадын талтай зөвлөлдөж байр сууриа нэгтгэхийг дэмжив.

Сайд А.С.Никитин сүүлийн үед Оросын тээврийн салбарт нэвтэрч буй шинэ техник технологи ялангуяа төмөр зам болон авто замд нэвтэрч байгаа “жолоочгүй” шийдлүүд хэрэгжиж эхэлсэн, нисгэгчгүй нисэх аппарат-дроныг ОХУ-ын хөдөө аж ахуй болон шуудангийн салбарт ажилттай ашиглаж холбогдох эрх зүйн асуудлыг шийдэж байгаа талаар танилцуулж, Зам, тээврийн сайд Б.Дэлгэрсайханыг ОХУ-д албан есоор айлчлахыг урив.

Талууд хөндөгдсөн асуудлуудын талаар цаашид хийх ажлыг тодорхойлох зорилгоор тус тусын холбогдох газар, агентлагуудын төлөөлөл орсон хамтарсан ажлын хэсгийг байгуулж хамтран ажиллахаар тохиролцов.