Зам, тээврийн сайд Б.Дэлгэрсайхан тэргүүтэй төлөөлөгчид өнөөдөр БНХАУ-ын Бээжин хотноо Азийн дэд бүтцийн хөрөнгө оруулалтын банк (АДБХОБ)-ны төв байранд зочлов. Сайд Б.Дэлгэрсайхантай хамтран Нийслэлийн Засаг дарга бөгөөд Улаанбаатар хотын захирагч Х.Нямбаатар уулзалтад оролцов.

Төлөөлөгчдийг Азийн дэд бүтцийн хөрөнгө оруулалтын банкны Төв, Баруун, Зүүн Ази, Европ, Ойрхи Дорнод, Латин Америкийн бүс нутгийн хөрөнгө оруулалт хариуцсан захирал Констанитин Лимитовский тэргүүтэй төлөөлөгчид хүлээн авч уулзан хамтын ажиллагааны талаар ярилцав.

Уулзалтаар талууд Улаанбаатар хотын нийтийн тээвэр, логистикийг сайжруулах замаар түгжрэл, агаарын бохирдол болон нийслэлд тулгамдаж буй бусад олон асуудлуудыг шийдвэрлэх зорилготой Улаанбаатар хотыг тойрсон Багахангай-Хөшгийн хөндий чиглэлийн салбар төмөр зам, Улаанбаатар метро төслийн санхүүжилтийн боломжуудын талаар санал солилцов.

Сайд Б.Дэлгэрсайхан, Хотын дарга Х.Нямбаатар нарын зүгээс эдгээр төслүүдийн бэлтгэл ажил, явц байдлын талаар мэдээлэл өгч, АДБХБ-ны санхүүжилтээр хэрэгжүүлэх сонирхолтой байгааг танилцуулав.

Азийн дэд бүтцийн хөрөнгө оруулалтын банкны зүгээс өөрийн байгууллагын холбогдох дүрэм журам, нөхцөл шаардлагуудыг хангасан дэд бүтцийн томоохон төслүүдийг санхүүжүүлэхэд бэлэн байгаагаа илэрхийлж, Улаанбаатар хотод хэрэгжүүлэх эдгээр төслүүдийг нарийвчлан судлан үзэх болно гэв. Мөн банкны зүгээс өөрийн байгууллагын төслийн санхүүжилт, хөрөнгө оруулалт, худалдан авалтын дүрэм журам, нөхцөл шаардлага, онцлогын талаар мэдээлэл хүргэх, таниулан  сурталчлах зорилгоор Монгол Улсад очиж ажиллахаар төлөвлөж байгаа ба ингэснээр өөрийн банкны үйлчилгээг Монгол Улсын сонирхсон байгууллагуудад амжилттай хүргэхэд дөхөм болно гэв.