Монгол Улсын Засгийн газрын гишүүн, Зам, тээврийн сайд Б.Дэлгэрсайхан өнөөдөр (2025.09.10) CRSC “Хятадын төмөр замын дохиолол холбоо групп” ХХК-ийн Намын хорооны дарга, ТУЗ-ийн дарга Лоу Чилян тэргүүтэй төлөөлөгчдийг хүлээн авч уулзлаа.

Зам, тээврийн сайд Б.Дэлгэрсайхан өнгөрсөн  07 дугаар сард Бээжин хотноо зохион байгуулагдсан “Дэлхийн өндөр хурдны төмөр замын 12 дугаар их хурал”-д оролцох үеэр тус компанийн төв байранд зочилж, төмөр замын дохиолол холбооны сүлжээ, сүлжээний аюулгүй байдал, үр ашиг, үйл ажиллагааг сайжруулах инноваци, ухаалаг технологийн шийдлүүдтэй танилцаж, хамтран ажиллах тухай ажил хэргийн уулзалтуудыг хийсэн билээ. 

Тиймээс уулзалтын эхэнд CRSC “Хятадын төмөр замын дохиолол холбоо групп” ХХК-ийн удирдах албаны хүмүүс Монгол Улсад хүрэлцэн ирж, ЗТЯ-нд тээврийн салбарын хамтын ажиллагааг өргөжүүлэх албан уулзалтыг дахин хийх боломж олдож буйд талархал илэрхийллээ.

CRSC “Хятадын төмөр замын дохиолол холбоо групп” ХХК нь төмөр замын харилцаа холбоо, тэр дундаа өндөр хурдны галт тэрэгний дохиолол холбооны системийн үйлдвэрлэл, хөгжүүлэлт, суурилуулалт, борлуулалтаар дэлхийд тэргүүлэгч томоохон компани юм.

Талууд уулзалтаар манай улсын төмөр замын тээврийн систем, тэр дундаа Монгол Улсын Засгийн газрын шийдвэрээр  хэрэгжиж буй төмөр замын төслүүдэд галт тэрэгний удирдлагын хяналтын системийн технологийг судалж боловсруулах, суурилуулж нутагшуулах, хөгжүүлэх шийдлүүдийн талаар санал солилцож, энэ чиглэлд хамтран ажиллах боломжуудын тухай дэлгэрэнгүй хэлэлцлээ.

Тухайлбал, Зам, тээврийн сайд Б.Дэлгэрсайхан “Монгол Улсын төмөр замын салбар 2019 оноос хурдацтай хөгжиж, бүтээн байгуулалтын ажлыг эрчимжүүлснээр 2500 гаруй км байсан төмөр замын шугам нэмэгдэж, өнөөдрийн байдлаар 3900 гаруй км, нийт ажиллагсдын тоо 18000 даваад байна.

Төмөр замын бүтээн байгуулалтууд хийгдсэнээр төмөр замын тээвэрлэлт 2 дахин өссөн бөгөөд төмөр замын аюулгүй, найдвартай байдал, тасралтгүй ажиллагаа, ажилтан албан хаагчдын хөдөлмөрийн аюулгүй байдал зэргийг давхар хангах асуудлыг авч үзэх шаардлагатай болсон. Иймээс дээрх асуудлыг шийдвэрлэхээр зохион байгуулалтын арга хэмжээ, дүрэм, журмын биелэлт, хууль эрх зүйн орчныг сайжруулан  ажиллаж байгаа боловч төмөр замын эргүүл, шалгалт, бодит байдлын хяналтад дэвшилтэт технологи, хиймэл оюун ухаанд суурилсан алсын зайнаас хянах технологийг нэвтрүүлэх зорилготой ажиллаж байна.  Өөрөөр хэлбэл, бид цаашид төмөр замын аль нэг хэсгийг хиймэл оюун ухаанд суурилсан хяналтын системээр тоноглож хэсэгчилсэн байдлаар болон бүхэлд нь хянах, орчны хяналтыг хяналтын камер, мэдрэгч төхөөрөмжийн тусламжтайгаар хянах зорилтыг тавин ажиллаж байна.

Ялангуяа, Монгол Улсын Засгийн газрын шийдвэрээр хэрэгжиж буй төмөр замын том төслүүдийн бүтээн байгуулалтын ажилд байнгын хяналт тавьж ажиллах, тэр дундаа талбайн гүйцэтгэл, төслийн явцыг шалгах ажилд шинэ техник технологи ашиглах шаардлагатай байгаа учраас CRSC “Хятадын төмөр замын дохиолол холбоо групп” ХХК-ийн хөгжүүлж, хэрэгжүүлж буй “Дрон технологи”-ийг нэвтрүүлж, ашиглах” саналтай байгаагаа уламжиллаа.

Мөн тус компанитай хамтран Монгол Улсад мэргэшсэн инженер техникийн ажилтныг бэлтгэх, төмөр замын галт тэрэгний хөдөлгөөний удирдлага, хяналтын программ хангамжийг хөгжүүлэх чиглэлээр төмөр замын дохиолол холбооны инженер техникийн ажилтнуудыг туршлага судлах, богино хугацааны хөтөлбөрт хамруулж, мэргэжлийн ур чадварыг дээшлүүлэхэд хамтран ажиллах саналтай байгаагаа илэрхийллээ.  

Хамтын ажиллагааны хүрээнд төмөр замын байгууллагуудын үйл ажиллагаа, хэрэгжүүлж буй төсөл хөтөлбөрүүд, ажлын явцтай танилцах, цаашид хамтран ажиллах чиглэлүүдийг илүү тодорхой болгох урьдчилсан судалгааг хамтран хийхээр тохиролцлоо.