Монгол Улсын баруун бүс, Баян-Өлгий аймгийн Өлгий суманд улсын төсвийн хөрөнгө оруулалтаар хэрэгжих Сагсай, Улаанхус, Цэнгэл сум чиглэлийн хатуу хучилттай авто замын дуусгал, 66 км авто замын барилгын ажлыг өнөөдөр (2025.07.12) албан ёсоор эхлүүлж, төслийн нээлтийг хийлээ.

Энэхүү Өлгий-Сагсай-Улаанхус-Цэнгэл-Даян боомт чиглэлийн авто зам бүрэн ашиглалтад орсноор Баян Өлгий аймаг төдийгүй Монгол Улсын импортын ачаа тээврийн хэмжээ нэмэгдэхээс гадна дээр дурдсан “гурван улсын ачаа тээврийн коридор” буюу ОХУ, БНХАУ-ын хооронд манай улсын нутаг дэвсгэрээр дамжин өнгөрөх транзит тээврийн олон улсын хэмжээний нэгэн том гарц нээгдэх юм.

Мөн Баян-Өлгий аймгийн байгалийн цогцолборт газрын аялал жуулчлал, бүс нутгийн худалдаа зэргийг хөгжүүлэхэд чухал нөлөө үзүүлж, ард иргэд тав тухтай, түргэн шуурхай зорчих боломж бүрдэхийн зэрэгцээ зорин ирэх гадаад болон дотоодын аялагч жуулчдын тоо улам нэмэгдэж, тухайн бүс нутгийн эдийн засаг, нийгмийн хөгжлийг түргэтгэн үйлдвэрлэл үйлчилгээг хөгжүүлэх боломж бүрдэх эдийн засгийн чухал ач холбогдолтой.

Нээлтийн үйл ажиллагаанд Монгол Улсын Их Хурал, Засгийн газрын гишүүн, Зам, тээврийн сайд Б. Дэлгэрсайхан, УИХ, Засгийн газрын гишүүн, Гэр бүл, хөдөлмөр, нийгмийн хамгааллын сайд Т.Аубакир, Баян-Өлгий аймгийн Засаг дарга Е.Зангар, Баян-Өлгий аймгийн ИТХ-ын дарга А.Бегарыс, Зам, тээврийн яамны Авто замын бодлого зохицуулалтын газрын дарга Ч.Сугармаа, Техник, технологийн хяналтын зөвлөх компани “Ихэр Мөнх” ХХК-ийн хяналтын инженер Б.Бат-Эрдэнэ, гүйцэтгэгч компани болох “Өвөр Монголын зам, гүүрийн групп” ХХК-ийн ерөнхий менежер Шэн Юн Фэй нар болон бусад холбогдох албаныхан оролцлоо.