Монгол Улсын Их Хурал, Засгийн газрын гишүүн, Зам, тээврийн сайд Б. Дэлгэрсайхан Үндэсний Их Баяр наадам тохиож буй энэ өдрүүдэд Баян Өлгий аймагт ажиллаж байна.

Тэрээр Монгол Улсын баруун бүс, Баян-Өлгий аймгийн Өлгий суманд улсын төсвийн хөрөнгө оруулалтаар хэрэгжих Сагсай, Улаанхус, Цэнгэл сум чиглэлийн хатуу хучилттай авто замын дуусгал, 66 км авто замын барилгын ажлын төслийн нээлтийг (2025.07.12) албан ёсоор нээлээ.

Мөн Монгол Улсад авто тээврийн салбар үүсэж хөгжсөний 100 жилийн ой тохиож байгаа энэ өдрүүдэд Баян Өлгий аймгийн Автотээврийн үндэсний төвийн салбарт зочилж, тус төвийн үйл ажиллагаатай танилцаж, байгууллагын удирдлагууд, ажилтан алба хаагчид, жолооч тээвэрчидтэй уулзлаа.

Уулзалтын үеэр Монгол Улсын Засгийн газраас зам тээврийн салбарт баримталж буй бодлого, шийдвэр, ЗТЯ-наас зам тээвэр, дэд бүтцийн салбарт хийж буй ажлууд, хэрэгжүүлэхээр төлөвлөж буй төсөл хөтөлбөрүүдийн талаарх мэдээллийг танилцуулж, жолооч тээвэрчдийнхээ санал бодол, тулгамдаж буй асуудлыг сонслоо.

Энэ үеэр мөн тээврийн салбарт идэвх зүтгэлтэй, үр бүтээлтэй ажилласан жолооч тээвэрчдийг шагнаж урамшуулж, Баян Өлгий аймгийн АТҮТ-ийн хамт олон болон жолооч тээвэрчдэд Үндэсний Их Баяр наадам болон Автотээврийн салбар үүсэж хөгжсөний 100 жилийн ойн баярын мэндчилгээг дэвшүүлж, жолооч тээвэрчдэд халуун баяр хүргэж, их амжилтыг хүслээ.