Монгол Улсын Ерөнхий сайд Г.Занданшатар, Зам, тээврийн сайд Б.Дэлгэрсайхан нар Засгийн газраас томилогдсон Ажлын хэсгийн хамт өнөөдөр (2025.08.07) “Багахангай-Хөшигийн хөндий” чиглэлийн салбар төмөр зам барих төслийн бүтээн байгуулалтын ажлын явцтай биечлэн танилцлаа.

Энэхүү шинээр баригдаж буй “Багахангай-Хөшигийн хөндий” чиглэлийн салбар төмөр зам нь “Улаанбаатар төмөр зам” ХНН-ийн “Багахангай” өртөөнөөс салбарлан Төв аймгийн Сэргэлэн сумын урдуур болон ”Чингис хаан” нисэх онгоцны буудлын урдуур чиглэн Хөшигийн хөндийд төлөвлөгдөж буй ачаа тээврийн гол зангилаа болох “Тээвэр логистикийн бүс” хүрэх төмөр замын салаа зам юм.

Багахангай өртөөний өргөтгөл хэсэг буюу төмөр зам салаалах хэсгийн ажлыг "Улаанбаатар төмөр зам" ХНН-ийн инженер техникийн ажилтнууд 2025 оны 06 сарын 10-аас 07 сарын 08-ны хооронд хийж гүйцэтгэсэн байна.

Харин Багахангай өртөөнөөс цааш үргэлжлэх Багахангай Хөшгийн хөндий чиглэлийн салбар төмөр замын шугам нь нийт 102 км урт дан замтай, 2 өртөө, 4 зөрлөгтэй, 2,5 км урт орчим гүүрэн байгууламжтай байхаар төлөвлөгдөж, бүтээн байгуулалтын ажил ид өрнөж байна.

Төмөр замын барилгын ажлыг одоогоор дотоодын 70 орчим ААН, компаниуд 2500 орчим инженер техникийн ажилтнууд, 1500 орчим техник хэрэгсэл, машин механизмтайгаар уртгасан цагаар буюу 24 цагаар хийж гүйцэтгэж байна.

Төмөр замыг холбогдох хууль тогтоомж, олон улсын стандарт, шаардлагад нийцүүлэн барьж байгуулах ажлыг “Монголын төмөр зам” ТӨХК гардан хариуцаж байгаа бөгөөд бүтээн байгуулалтын ажлыг 2025 оны 9-10 дугаар сард дуусгаж ашиглалтад оруулахаар шахуу төлөвлөгөөтэй ажиллаж байгааг албаныхан хэлж байлаа.

Салбар төмөр зам барих бүтээн байгуулалтын хугацаанд нийт 3000 орчим түр ажлын байр шинээр бий болох бөгөөд төслийг хэрэгжүүлснээр 420 хүн шинээр байнгын ажлын байраар хангагдах зэрэг олон талын ач холбогдолтой юм.

Мөн төслийн барилга угсралтын бүхий л шатанд туслан гүйцэтгэгчээр үндэсний 70 гаруй компани ажиллаж байгаа нь монголчууд өөрсдөө төмөр замаа барьж чаддаг болсныг илтгэж байна.

Уг төслийн эхний үе шатны 87 км төмөр замыг барихад 850 орчим тэрбум төгрөгийг зарцуулах бөгөөд энэ хэмжээгээр төслийн хөрөнгө оруулалтын үр өгөөжийг дотоодын аж ахуйн нэгжүүд хүртэх зэрэг эдийн засгийн ач холбогдолтой. Эргээд энэ төсөл хөрөнгө оруулалтаа нөхөх 10 жилийн хугацаанд Монгол Улсад нийт 294.8 тэрбум төгрөгийн татвар төлнө. Өөрөөр хэлбэл, энэ салбар төмөр замаар 2025-2027 онд жил тутам 3.5 сая тонн ачаа, 2028 онд 7 сая тонн ачаа, 2029-2030 онд жил тутам 15 сая тонн ачаа, 2031-2039 онд жил тутам 20 сая тонн ачаа тус тус тээвэрлэх эдийн засгийн тооцоо судалгаатай. Тэр утгаараа тус төсөл нь хөрөнгө оруулалтаа 10 жилийн хугацаанд нөхөж нийт 1.3 их наяд төгрөгийн цэвэр ашигтай ажиллах юм.

Багахангай Хөшгийн хөндийн салбар төмөр замын барилга угсралтын ажил 2025 оны 04 дүгээр сарын 25-нд төслийн нээлт хийснээр албан ёсоор эхэлж байсан бол өнөөдрийн байдлаар далан байгуулах ажил 58,12 хувьтай, ухмал хийх ажил 69,79 хувьтай, гүүрийн ажил 65,4 хувийн гүйцэтгэлтэй, чанар стандарт шаардлагын дагуу амжилттай урагшилж байна.