БНСУ-ын Газар, дэд бүтэц, зам тээврийн яамны зохион байгуулж буй "Дэлхийн дэд бүтцийн хамтын ажиллагааны бага хурал-2025" есдүгээр сарын 6-18-ны өдрүүдэд Сөүл хотноо болж байна.

Хуралд  дэлхийн 30 гаруй орны зам, тээврийн сайд, дэд сайд, яамдын газрын дарга нар,  компанийн удирдлагууд, БНСУ-ын тэргүүлэх барилгын компаниуд, хурдны зам корпораци,  барилгын технологийн хүрээлэн (KICT), IFC, ADB болон бусад төрийн байгууллагын төлөөлөл оролцож байна.

Уг хуралд Монгол Улсыг төлөөлж  Зам тээврийн яамны Авто замын бодлого зохицуулалтын газрын дарга Ч.Сугармаа оролцож байгаа бөгөөд БНСУ-ын Газар дэд бүтэц тээврийн яамны Стратеги төлөвлөлтийн газрын дарга Ли Сан Ил тэргүүтэй албаныхантай уулзлаа.

Уулзалтын эхэнд Авто замын бодлого зохицуулалтын газрын дарга Ч.Сугармаа Монгол Улсын Авто замын салбарт 2024 оноос хэрэгжиж буй K-Смарт авто замын менежментийн системд суурилсан улсын чанартай авто замын нэгдсэн цахим удирдлагын тогтолцоог бий болгох буцалтгүй тусламжийн төслийг амжилттай хэрэгжүүлж байгаад гүнээ талархал илэрхийлэв.  

Мөн 2025 онд Авто замын салбарт дахин буцалтгүй тусламжийн төслийг хэрэгжүүлэхээр талууд харилцан тохиролцлоо. Тухайлбал, төслийн хүрээнд полимер бүлээн асфальтбетон хольцыг үйлдвэрлэх замаар хүлэмжийн хийг бууруулах олон улсын төслийн урьдчилсан ТЭЗҮ-г боловсруулах ажлыг энэ оноос эхлүүлэх бөгөөд төслийн нээлтийн уулзалтыг (KICK-OFF Meeting) Монгол Улсад зохион байгуулах талаар тохиролцов.

Мөн хамтрагч байгууллагуудын нягт хамтын ажиллагааг ханган, төр хувийн хэвшлийн түншлэл хэлбэрээр хэрэгжүүлэн ажиллахыг талууд онцлон тэмдэглэв.  

Уулзалтын төгсгөлд Монгол Улсын авто замын салбарт шинэ технологи нэвтрүүлэх, инженер техникийн ажилтнуудыг чадавхижуулах сургалт хөтөлбөр хэрэгжүүлэх, хамтарсан судалгаа хөгжүүлэлт хийх, Монгол-Солонгосын засгийн газар хоорондын авто замын салбарын хамтын ажиллагааны хурлыг жил бүр зохион байгуулахад дэмжлэг үзүүлэхээ БНСУ-ын тал илэрхийлэв.