“Шинэ сэргэлтийн бодлого” болон “Боомтын сэргэлт хөтөлбөр”, Монгол Улсын Засгийн газрын 2024–2028 оны үйл ажиллагааны хөтөлбөрт эдийн засгийн өсөлт, экспорт, зам тээврийн сүлжээг өргөжүүлэх зорилтыг тавьсан. Энэхүү зорилтын  хүрээнд Зам, тээврийн яамнаас дараах томоохон авто замын боомт холбосон төслүүдийг хэрэгжүүлж эхлээд байна.

Баруун Урт – Бичигт боомт чиглэлийн авто замын төслийн барилгын ажлыг эхлүүллээ

2025 онд улсын төсвийн хөрөнгө оруулалтаар Баруун-Урт–Бичигт чиглэлийн 152км авто замын барилгын ажлыг эхлүүлээд байна. Тус замын барилгын ажлын гүйцэтгэгчээр “Монгол зам групп” ХХК шалгарч, 2025 оны 06 сарын 28-ны өдөр ажлаа эхлүүлсэн бөгөөд барилгын ажлын гэрээгээр 2027 онд ашиглалтад оруулахаар төлөвлөж байна.  Уг төсөл нь Төв Азийн эдийн засгийн хамтын ажиллагааны (CAREC-4C) коридорт нэгдэхийн зэрэгцээгээр БНХАУ-ын Тянжин, Жинжоу, Далиан боомтоор дамжин худалдаа хийх боломжийг бүрдүүлнэ. Мөн Сүхбаатар аймгийн хөдөө аж ахуй, мал аж ахуй, уул уурхайг түшиглэн мах боловсруулах, аялал жуулчлал болон бүс нутгийн худалдааг хөгжүүлэхэд чухал дэмжлэг үзүүлэх ач холбогдолтой юм.

Өлгий-Даян боомт чиглэлийн авто замын төслийн ажил үргэлжилж байна

Улсын төсвийн хөрөнгө оруулалтаар 2024-2025 онд Баян-Өлгий аймгийн Өлгий-Сагсай-Улаанхус-Цэнгэл сум чиглэлийн авто замын нийт 89,13 км авто замын барилгын ажлыг эхлүүлсэн.  Энэхүү төсөл нь 2024 онд эхэлсэн бөгөөд 23,13 км авто замын барилгын ажлын гүйцэтгэгчээр "Чайна Роуд энд Бридж Корпорейшн" ХХК ажиллаж, гүйцэтгэл 33 хувьтай үргэлжилж байна.  Харин төслийн үргэлжлэл болох 66 км авто замын ажил 2025 оны 07 дугаар сард эхэлж, гүйцэтгэгчээр "Өвөр монголын зам, гүүрийн групп" ХХК ажиллаж, гүйцэтгэл 2 хувьтай үргэлжилж байна.

Төсөл хэрэгжсэнээр Даян боомт хатуу хучилттай авто замаар холбогдсоноор ачаа тээврийн зардал, хугацаа буурч, экспорт, импортын урсгал нэмэгдэн эдийн засаг, аялал жуулчлал, бүс нутгийн хөгжилд дэмжлэг үзүүлнэ.