ТӨМӨР ЗАМЫН САЛБАРТ: УИХ-аар баталсан Засгийн газрын 2024-2028 оны үйл ажиллагааны хөтөлбөрт бодлогын үндсэн дөрвөн чиглэлийн хүрээнд 14 мега төслийг хэрэгжүүлэхээр тусгасны нэгдүгээрт “Гашуунсухайт-Ганцмод, Ханги-Мандал, Шивээхүрэн-Сэхэ хилийн боомтын хил дамнасан холболтын төмөр зам, ачаа тээврийн шилжүүлэн ачих терминалыг барина гэж тусгасан. Тус төслийг хэрэгжүүлснээр манай улсын нийт экспорт болон, зорчигч, ачаа тээврийн нэвтрэх хүчин чадал нэмэгдэж, тээврийн хэрэгсэл хилийн боомтоор түргэн шуурхай нэвтрэх, зорчигчид ая тухтай үйлчлүүлэх боломж бүрдэх юм.

“Гашуунсухайт-Ганцмод боомтын хил дамнасан төмөр замын гүүрийг хамтран барих тухай Монгол Улсын Засгийн газар, БНХАУ-ын Засгийн газар хоорондын хэлэлцээр”-ийн дагуу хоёр улсын хил дамнасан хэсэгт “Бүтээн байгуулалтын хаалттай бүс” байгуулж, гүүрийн барилгын ажлыг гүйцэтгэх бөгөөд уг бүсэд мөрдөх түр журам боловсруулах, бүсийг хашаажуулж, камержуулах, бүс дотор ажлын байр, ажилчдын кемп байгуулах, хил гаалийн хяналтын барилга барих, бараа материал, техник, тоног төхөөрөмж зөөвөрлөх, хадгалах зам талбай байгуулах, барилгын ажилд ашиглах бетон узель, лаборатори байгуулах бэлтгэл ажлуудыг хийж гүйцэтгээд байна.

Төслийн хүрээнд төмөр замын дээд, доод бүтэц, гүүр, хоолой, эрчим хүч, дохиолол холбоо, барилга байгууламж, авто зам гэсэн багц ажлууд хийгдэх бөгөөд өнөөдрийн байдлаар хилийн бүс дэх гүүрийн барилга угсралтын ажил эхэлж, төслийн талбайд хяналтын 6 инженер, гүйцэтгэгчийн 19 инженер, 93 техникийн ажилчид, нийт 35 машин механизм ажиллаж байна.

Гүйцэтгэгч БНХАУ-ын “Хятадын төмөр замын барилгын гүүрийн инженерийн групп” ХХК нь Гашуунсухайт-Ганцмод боомтын хил дамнасан төмөр замын бүтээн байгуулалтыг сүүлийн үеийн шинэ технологиор, хурдан шуурхай, чанарын өндөр түвшинд хийж гүйцэтгэхээр бэлтгэл ажлыг хангаж буй бөгөөд сүүлийн үеийн иж бүрэн тоног төхөөрөмжөөр тоноглогдсон 10 төрлийн шинжилгээ хийх, үр дүн боловсруулах болон баримт бичиг архивлах лаборатори байгуулан төслийн бараа, материалын шинжилгээг хийж байна.

2025 оны 09 дүгээр сарын 01-ний өдөр бүтээн байгуулалтыг санхүүжүүлэгч “Эрдэнэс Тавантолгой” ХК, гүйцэтгэгч БНХАУ-ын “Хятадын төмөр замын барилгын гүүрийн инженерийн групп” ХХК-д урьдчилгаа төлбөрийг шилжүүлснээр бүтээн байгуулалтын бусад багцын ажлыг эхлэх нөхцөл боломжийг бүрдүүлээд байна