ТӨМӨР ЗАМЫН САЛБАРТ:  Засгийн газрын 2025 оны 21, 86, 230 дугаар тогтоолоор  Багахангай-Хөшигийн хөндий чиглэлд салбар төмөр зам барихаар шийдвэрлэсний дагуу 2025 оны 04 дүгээр сарын 25-ны өдөр албан ёсоор нээлт хийн барилгын ажлыг эхлүүлсэн. Төслийн ажилд одоогоор дотоодын 63 ААН, байгууллагын 2748 инженер техникийн ажилчид, 1453 техник, тоног төхөөрөмжтэй ажиллаж байна. Төслийн бүтээн байгуулалтын ажил 90 орчим хувийн гүйцэтгэлтэй үргэлжилж байна.

Энэхүү төсөл нь  улс орны хөгжлийн стратегийн шинжтэй төсөл бөгөөд зөвхөн санхүүгийн өгөөж төдийгүй нийгэм, хүрээлэн буй байгаль орчинд үзүүлэх эерэг нөлөөллөөр онцгой ач холбогдолтой юм. Тухайлбал, Хөшигийн хөндий чиглэлийн төмөр замыг барьж ашиглалтад оруулснаар Улаанбаатар хотын дундуур явах төмөр замын ачааллыг бууруулахад бодит хувь нэмэр оруулна.  

Хамгийн чухал нь, аюултай ачаа бараа буюу нийслэл хот руу нэвтэрдэг, шатахуун, тэсэрч дэлбэрэх бодис зэрэг 34 нэр төрлийн аюултай болон химийн аюултай ачааг хот дундуур тээвэрлэхгүй, Богд уулын урдуур явах Багахангай-Хөшигийн хөндий чиглэлийн шинэ төмөр замаар тээвэрлэж, нийслэлийн иргэдийн аюулгүй орчинд амьдрах нөхцлийг хангана. Тоо баримт дурьдахад, “Улаанбаатар төмөр зам” ХНН-ийн замаар 2024 оны байдлаар 37642 вагон буюу 2,484,494 тн аюултай ачаа ирж буусан бөгөөд нийт ачааны 49 хувийг  дизель түлш, 35 хувийг бензин, 5 хувийг  аммоны нитрит, 3 хувийг газ, 8 хувийг  бусад төрлийн бодис зэрэг буюу аюултай ачаа эзэлсэн байна. Төсөл хэрэгжснээр аюултай ачааг Улаанбаатар хотод буулгадаг байдлыг дуусгавар болгож, сар бүр Улаанбаатар, Толгойт өртөөнд 400-500 вагон 5-10 хоног зогсдог байдлыг эцэслэж, нийслэл хотын иргэдийн аюулгүй амьдрах нөхцлийг бүрдүүлэхэд бодит хувь нэмрийг  оруулах юм.

 Төсөл хэрэгжсэнээр жилд өссөн дүнгээр нийслэл орчмын томоохон ачааны терминалууд руу тээвэрлэгдэх 20 сая.тн хүртэлх ачааг Улаанбаатар хотод оруулахгүй шинээр баригдах Тээвэр логистикийн төв рүү тээвэрлэхээр төлөвлөж байна. Ингэснээр нийслэлд төмөр зам, автозам огтлолцдог гармууд дээр галт тэрэгний хөдөлгөөнд зориулж хоногт дунджаар 144 минут авто замын хөдөлгөөн хаадаг хугацааг 120 минут хүртэл багасгах боломжтой. Ингэснээр нийслэлийн автозамын түгжрэлийг бууруулахад тодорхой хувиар дэмжлэг үзүүлнэ.  Мөн энэхүү салбар төмөр зам ашиглалтад орсон эхний жилээс 3.5 сая тонн ачаа, цаашлаад жил тутам өсөн нэмэгдсэн дүнгээр 20 сая тонн хүртэл ачаа тээвэрлэхээр тооцвол хоногт дунджаар 316-1800 орчим том оврын авто машиныг нийслэлийн хөдөлгөөнд оролцуулахгүй байх боломжтой.   

Төмөр замын бүтээн байгуулалтыг барих хугацаанд 3000 орчим түр ажлын байр шинээр бий болох бөгөөд төслийг хэрэгжүүлснээр 420 хүн байнгын ажлын байраар хангагдан ажиллаж байна. Багахангай өртөөний өргөтгөлийн ажлыг “Улаанбаатар төмөр зам” ХНН өөрийн хөрөнгөөр барьж байгуулан бүрэн дуусгасан.  Төслийн бүтээн байгуулалтын ажил 90 орчим хувийн гүйцэтгэлтэй үргэлжилж байна.