ИРГЭНИЙ НИСЭХИЙН САЛБАРТ : Агаарын тээврийг либералчилж, нислэгийн сүлжээг өргөжүүллээ

1. Монгол Улсын Засгийн газрын үйл ажиллагааны хөтөлбөрт тусгагдсан агаарын тээврийг либералчлах бодлогын хүрээнд “Агаарын харилцааны тухай Монгол Улсын Засгийн газар, Саудын Арабын Хаант Улсын Засгийн газар хоорондын хэлэлцээр”-ийг Улаанбаатар хотноо 2025 оны 07 дугаар сарын 16-ны өдөр байгууллаа.

2. Хөвсгөл аймгийн Мөрөнгийн нисэх буудалд   2025 оны долдугаар сарын 29-ний өдөр анх удаа Олон улсын нислэг хүлээн авлаа. "Hunnu Air" компани “ЧОНЖУ – МӨРӨН” чиглэлийн олон улсын анхны нислэгээ үйлдлээ.

3. “МИАТ” ТӨХК нь Шанхай чиглэлийн нислэгийг 2025 оны 07 дугаар сарын 02-ны өдрөөс, Эрээн чиглэлийн нислэгийг 2025 оны 08 дугаар сарын 08-ны өдрөөс тус тус эхлүүллээ. “Хүннү Эйр” ХХК нь Ташкент чиглэлд 2025 оны 09 дүгээр сарын 12-ны өдөр шинээр нислэг үйлдэж эхлэхээр бэлтгэл ажлаа бүрэн хангаад байна.

4. “Чингис хаан” олон улсын нисэх буудлын хүчин чадлыг нэмэгдүүлэх төслийг хэрэгжүүлэхээр Япон Улсын Олон улсын хамтын ажиллагааны байгууллага (ЖАЙКА)-ын судалгааны баг бэлтгэл судалгааны ажлыг хийж гүйцэтгэж байна. Энэ хүрээнд байгаль орчин, нийгмийн нөлөөллийн урьдчилсан үнэлгээг эхлүүлээд байна.

Нисэх буудлын хүчин чадлыг өргөтгөж, зорчигч урсгалыг нэмэгдүүллээ

Монгол Улсын засгийн газраас 2023-2028 оныг “Монголд зочлох жил” болгон зарлаж, дөрвөн улирлын аялал жуулчлалыг хөгжүүлэх зорилт тавин тусгайлсан бодлого арга хэмжээг хэрэгжүүлж байна. Энэ хүрээнд бүс нутгийн дэд бүтэц, агаарын тээврийг хурдтай хөгжүүлэх ажил маш чухалд тооцогдож байна. ЗТЯ-наас энэ ажлын хүрээнд:

• Арабын эдийн засгийн хөгжлийн Кувейтийн сангийн 3.5 сая ам.долларын буцалтгүй тусламжийн хөрөнгө оруулалт, ЗТЯ-ны захиалгаар Хэнтий аймагт “Өндөрхаан нисэх онгоцны буудлыг шинэчлэн барих төсөл”-ийг 2020-2025 онд хэрэгжүүлж, Багц-2 хөөрч буух зурвасыг 2024 оны 13/01/24, Багц-1 зорчигч үйлчилгээний барилга, байгууламжийг 2025 оны АОК-2025/05 дугаар дүгнэлтээр тус тус байнгын ашиглалтад орууллаа.

• “Гурвансайхан” нисэх буудлын зурвасын их засварын ажлыг гүйцэтгэлээ. Сонгон шалгаруулалтаар “Чамбайзам” ХХК шалгарч,  2025 оны 4 дүгээр сарын 22-нд зурвас засварын ажлыг эхлүүлж, 2025 оны 6 дугаар сарын 15-ны өдөр нийт 55 хоногийн хугацаанд ажлыг  хийж гүйцэтгэн ашиглалтад хүлээлгэн өглөө.

• “МИАТ” ТӨХК шинэ агаарын хөлгөө хүлээн авлаа. Тус компани Канад улсын “Bombardie”r үйлдвэрийн “CRJ-700” загварын агаарын хөлгийг үйл ажиллагаандаа ашиглахаар ахин нэгийг нэмж авлаа. Энэхүү агаарын хөлөг нь Өмнөд Африкийн Бүгд Найрамдах Улсын Йоханнесбург хотоос нийт 12265 км агаарын замыг туулж, (2025.07.30) Монгол Улсад ирлээ.