Зам, тээврийн яамны Төрийн нарийн бичгийн дарга Б.Насантогтох Исламын Бүгд Найрамдах Иран улсаас БНХАУ-аас Монгол Улсыг хавсран суугаа Онц бөгөөд бүрэн эрхт Элчин сайд Абдулреза Рахманий Фазли нарын төлөөлөгчдийг өнөөдөр /2025.10.03/ хүлээн авч уулзлаа.

Уулзалтын эхэнд Төрийн нарийн бичгийн дарга Б.Насантогтох Элчин сайдыг хүрэлцэн ирсэнд талархал илэрхийлээд, яамны зүгээс сүүлийн жилүүдэд олон улстай автотээвэр, агаарын тээврийн харилцааг өргөжүүлэх, гадаад улс орнуудтай хийж буй худалдааг дэмжих бодлого баримтлан ажиллаж байгаагаа танилцууллаа.

Хариуд нь Элчин сайд Абдулреза Рахманий Фазли уулзаж байгаад баяртай байгаагаа илэрхийлээд, хоёр орны хувьд автотээврийн харилцааны гэрээг байгуулахад бэлэн буйгаа онцоллоо. Тодруулбал, Элчин сайдын хувьд Иран улсыг төлөөлж буй элчийн хувьд бүх төрлийн яриа хэлэлцээрийг хийх бүрэн эрхтэй тул Монголын талтай автотээвэр, агаарын тээврийн харилцааны гэрээг хэлэлцээрийн шатанд хүргэхээр тохирч болно гэдгээ мэдэгдлээ.

Хэрэв автотээврийн харилцааны гэрээг байгуулсан тохиолдолд монголын тээвэрчид Иран улсын нутаг дэвсгэрээр дамжин Европ руу тээвэрлэлт хийх боломж нээгдэх юм.

Уулзалтын төгсгөлд Төрийн нарийн бичгийн даргын зүгээс цаашид авто тээврийн харилцааг хөгжүүлэх, авто тээврийн хамгийн үр ашигтай маршрутыг тогтоох зэргээр хоёр орны бизнесийн хамтын ажиллагаанд тээврийн таатай нөхцөл бүрдүүлэх чиглэлээр хамтран ажиллаж, хэлэлцээрийн төсөл дээр үргэлжлүүлэн хамтран ажиллах боломжтой болохоо илэрхийлэв.