Зам, тээврийн сайд Б.Дэлгэрсайхан  Монгол Улсын Засгийн газар, Ерөнхий сайд Г.Занданшатар болон Засгийн газрын гишүүдэд 2025-2026 оны өвөлжилтийн бэлтгэл ажлын явцыг танилцууллаа. (2025.10.15)

Зам, тээврийн салбарын өвөлжилтийн бэлтгэл ажлын явц 2025 оны 10 дугаар сарын 15-ны өдрийн байдлаар 89.26 хувийн биелэлттэй байна.

ЗТЯ-ны зүгээс зам, тээврийн салбарын өвөлжилтийн бэлтгэл ажлыг төлөвлөсөн хугацаанд хийж дуусгах, ажлын явцад хяналт тавих, шаардлагатай тохиолдолд гарсан хүндрэлийг шуурхай зохицуулах, мэдээллээр хангах үүрэг бүхий ажлын хэсгийг Зам, тээврийн сайдын 2025 оны А/183 дугаар тушаалаар байгуулан хэрэгжилтэд хяналт тавин ажиллаж байна.

Зам, тээврийн салбарын харьяа 12 байгууллагын саналыг үндэслэн нийт 249 арга хэмжээ бүхий “Зам, тээврийн салбарын 2025-2026 оны өвөлжилтийн бэлтгэл хангах нэгдсэн арга хэмжээний төлөвлөгөө”-ний биелэлтэд хяналт тавин хэрэгжилтийг хангуулан ажиллаж байна.

Нэгдсэн төлөвлөгөөнд нийт 6 чиглэлийн 249 ажил төлөвлөсөн бөгөөд 2025 оны 10 дугаар сарын 15-ны өдрийн байдлаар хэрэгжилт дунджаар 89.26 хувийн гүйцэтгэлтэй байна. Үүнээс:

-           Иргэний нисэхийн чиглэлээр 92 хувь,

-           Төмөр замын чиглэлээр 90 хувь,

-           Авто замын чиглэлээр 88 хувь,

-           Автотээврийн чиглэлээр  88 хувь

-           Усан замын чиглэлээр 95 хувийн гүйцэтгэлтэй байна.

ӨВӨЛЖИЛТИЙН БЭЛТГЭЛ АЖЛЫН ХҮРЭЭНД ХИЙЖ ГҮЙЦЭТГЭСЭН  АЖЛУУД

 1."Монголын төмөр зам" ТӨХК нь өөрийн эзэмшлийн 130 хагас вагоноор "Тавантолгой түлш" ХХК-ийн мидлинг тээвэрлэлтийг Тавантолгой-Баян чиглэлд 5.5 хоногийн эргэлттэй зохион байгуулж байна.

2.“УБТЗ” ХНН-ийн зорчигчийн 92 вагоныг өвлийн тээвэрт бэлтгэх үзлэг засварыг бүрэн хийгээд байна.

3.Дулааны цахилгаан станцуудын өвлийн нүүрс тээвэрлэлтийг зохион байгуулахад 1712 ачааны хагас вагон шаардлагатай ба 330 хагас вагонд 6 сараар ашиглалтын хугацааг сунгаж, нүүрс тээвэрт оролцох боломжтой талаар дүгнэлт гаргасан. "Эрдэнэт үйлдвэр" ТӨҮГ-ын  экспортын зэсийн баяжмалын тээвэрт ашиглаж буй 351 ачааны хагас вагоныг нүүрс тээвэрт татан оролцуулах саналыг Засгийн газрын хуралдаанд танилцуулан шийдвэрлүүлсэн.

4.Галлагааны улиралд гэр хорооллын айл өрхүүдийн хагас коксжих нүүрсийг “УБТЗ” ХНН нь Замын-Үүд /Эрээн/-Баян чиглэлд “Талын хишиг майнинг” ХХК-ийн 288, “Дархан төмөрлөгийн үйлдвэр” ХХК-ийн 48 ачааны хагас вагоноор тус тус тээвэрлэлтийг зохион байгуулан ажиллаж байна.

5.“АЗЗА нэгтгэл” ТӨҮГ болон хувийн хэвшлийн аж ахуй нэгжүүд нийт 518 тн давс,1747,5 м3 овоолгоны материалыг нөөцлөөд байна.

ӨВӨЛЖИЛТИЙН БЭЛТГЭЛ АЖЛЫН ХҮРЭЭНД ТУЛГАМДАЖ БУЙ АСУУДЛУУД:

Зам, тээврийн сайд Б.Дэлгэрсайхан өвөлжилтийн бэлтгэл ажлын хүрээнд төсвийн тодотголоос шалтгаалан дараах тулгамдаж буй асуудлуудыг танилцууллаа.  Тухайлбал,

-           Монгол Улсын 2025 оны төсвийн тухай хуулиар авто замын арчлалт, засварын ажилд 115.6 тэрбум төгрөг батлагдаж, уг хөрөнгөөр хийгдэх ажлуудыг тодорхойлж, хэрэгжилтийг ханган ажиллаж байсан боловч 2025 оны төсвийн тодотголоор 42.8 тэрбум төгрөгийг танаж, 72.8 тэрбум төгрөг болгон бууруулсан.

-           Хөрөнгө татагдсанаас шалтгаалан зам хариуцагч байгууллагуудын 2025 оны эхэнд гүйцэтгэсэн 5.3 тэрбум төгрөгийн өртөгтэй онцгой ажлын /цасанд боогдсон зам, давааг нээх, үерийн эвдрэлийг засварлах зэрэг/ санхүүжилт олгогдоогүй.

-           Өвөлжилтийн бэлтгэл ажлын хүрээнд шатахуун, түлш, хуурай элс, давс, цас хайлуулах бодис, сэлбэг хэрэгсэл болон бусад шаардлагатай материал нөөцлөх ажилд хөрөнгө санхүүжилт дутагдалтай байна.

-           Өвлийн улиралд, цаг уурын хүндрэлтэй нөхцөлд зам давааг нээх, байнгын бэлэн байдлыг хангах, тээврийн хөдөлгөөнийг саадгүй нэвтрүүлэх үүрэгтэй шуурхай ажлын хэсгүүдэд шаардагдах хөрөнгө шийдвэрлэгдээгүйгээс өнөөдрийн байдлаар ажиллаж эхлээгүй байна. Үүнд нийт 50 цэгт ажиллах шуурхай ажлын хэсгийн зардалд 868.3 сая төгрөг шаардлагатай байна.

Иймд цаашид авах арга хэмжээний саналд  “ Зам хариуцагчийн онцгой ажлын дутуу санхүүжилт 5.3 тэрбум төгрөг, шуурхай ажлын хэсгүүдийн үйл ажиллагааны зардалд шаардлагатай 868.3 сая төгрөг, төлбөр авах цэгүүдийн хэвийн үйл ажиллагааг хангах зардал, олон улс, улсын чанартай 14909.0 км авто замын өвлийн арчлалт, онцгой ажилд шаардагдах 5.8 тэрбум, нийт 12 тэрбум төгрөгийн хөрөнгийг шийдвэрлэх зайлшгүй шаардлагатай байна. Дээрх асуудлыг хэлэлцэн шийдвэрлэж өгнө үү хэмээн танилцууллаа.