УИХ-аар баталсан Засгийн газрын 2024-2028 оны үйл ажиллагааны хөтөлбөрт бодлогын үндсэн дөрвөн чиглэлийн хүрээнд 14 мега төслийг хэрэгжүүлэхээр тусгасны нэгдүгээрт “Гашуунсухайт-Ганцмод, Ханги-Мандал, Шивээхүрэн-Сэхэ хилийн боомтын хил дамнасан холболтын төмөр зам, ачаа тээврийн шилжүүлэн ачих терминалыг барина гэж тусгасан.

Монгол, Хятадын Гашуунсухайт-Ганцмод боомтын хил дамнасан төмөр замыг бүтээн байгуулах тухай Засгийн газар хоорондын хэлэлцээрийг 2025 оны 02 дугаар сарын 14-ний өдөр байгуулсны дагуу “Эрдэнэс Тавантолгой” ХК, “Тавантолгой төмөр зам” ХХК, Хятадын талаас “Төмөр замын барилгын гүүрийн инженерийн товчоо групп” компаниуд санхүүжилтийн гурван талт гэрээг 2025 оны 08 дугаар сард байгуулж, тус гэрээний дагуу 30 хувийн урьдчилгаа төлбөрийг гүйцэтгэгч талд шилжүүлснээр хил дамнасан төмөр замын бүтээн байгуулалтын ажил албан ёсоор эхэлсэн билээ.

Зам тээврийн яамнаас 2025 оны 10 дугаар сарын 25-ны өдөр тус төслийн бүтээн байгуулалтын ажлын явцтай танилцлаа. Төслийн хүрээнд 19.5 км төмөр замын дээд, доод бүтэц, 6-30 м өндөр эстакад болон жаазан гүүр, эрчим хүчний дэд станц, шугам сүлжээ, дохиолол төвлөрүүлэлт хориглолын систем, барилга байгууламж, авто зам гэх мэт багц ажлуудыг гүйцэтгэхээс өнөөдрийн байдлаар бүтээн байгуулалтын ажлын нийт явц 4 хувьтай урагшилж байна.

Барилгын ажлын бэлтгэл ажлын хүрээнд бетон зуурмагийн үйлдвэрийн угсралтын ажил 51.5 хувь,  арматур бэлтгэх талбайн ажил 81.5 хувь,  дайрга хадгалах агуулах 37.67 хувь,  ажилчдын кемп байгуулах ажил 83.33 хувь,  хаалттай бүсэд 6 байршилд хаалга хийхээр Хил хамгаалах байгууллагатай зөвшилцсөн.

Мөн бүсэд мөрдөх түр журам боловсруулах, бүсийг хашаажуулж, камержуулах, бүс дотор ажлын байр, ажилчдын кемп байгуулах, хил гаалийн хяналтын барилга барих, бараа материал, техник, тоног төхөөрөмж зөөвөрлөх, хадгалах зам талбай байгуулах, барилгын ажилд ашиглах бетон узель, лаборатори байгуулах ажлуудыг хийж гүйцэтгээд байна.

Гүйцэтгэгч БНХАУ-ын “Хятадын төмөр замын барилгын гүүрийн инженерийн групп” ХХК нь Гашуунсухайт-Ганцмод боомтын хил дамнасан төмөр замын бүтээн байгуулалтыг сүүлийн үеийн шинэ технологиор, хурдан шуурхай, чанарын өндөр түвшинд хийж гүйцэтгэхээр бэлтгэл ажлыг хангаж буй бөгөөд сүүлийн үеийн иж бүрэн тоног төхөөрөмжөөр тоноглогдсон 10 төрлийн шинжилгээ хийх, үр дүн боловсруулах болон баримт бичиг архивлах лаборатори байгуулан төслийн бараа, материалын шинжилгээг хийж байна.

Өнөөдрийн байдлаар төслийн талбайд хяналтын 6 инженер, гүйцэтгэгчийн 18 инженер, 146 техникийн ажилчид, нийт 35 машин механизм ажиллаж байна.