Онцгой байдлын ерөнхий газраас 2025 оны аравдугаар сарын 21-22-ны өдрүүдэд Гамшгаас хамгаалах иж бүрэн үзлэг шалгалтыг Зам, тээврийн яам болон түүний харъяа 12 байгууллагад зохион байгууллаа.

Тус үзлэгт 228 ажилтан, алба хаагч тусгай зориулалтын техник хэрэгсэл, багаж хэрэгсэлтэйгээр бэлэн байдлаа ханган оролцлоо.

Энэхүү үзлэг шалгалт нь Монгол Улсын Гамшгаас хамгаалах тухай хууль, Галын аюулгүй байдлын тухай хууль, Гамшгаас хамгаалах талаар төрөөс баримтлах бодлого болон бусад хууль тогтоомж, эрх зүйн баримт бичгийн хэрэгжилтийг хангуулах, болзошгүй гамшгийн үед гамшгаас хамгаалах томилгоот бүрэлдэхүүний бэлтгэл, бэлэн байдлыг сайжруулах, үүрэг гүйцэтгэх чадавхийг дээшлүүлэх зэрэг олон талын ач холбогдолтойг холбогдох албаныхан онцолж байлаа.

Зам, тээврийн яам буюу Зам, тээврийн улсын алба бол гамшиг эрсдлийн үед өндөржүүлсэн бэлэн байдалтай ажиллах чухал салбар. Байгалийн гамшгийн үед үер уснаас үүдэж, зам эвдрэх угаагдах, салхи шуурганд  зам, даваа хаагдах эрсдэлтэй үед зам тээврийн салбар гамшгаас хамгаалах төлөвлөгөө, хүний нөөц,  техник хэрэгслийн бэлэн байдлыг шуурхай ханган ажиллах, авто зам, тээвэрлэлтийн аюулгүй байдлыг хангуулах, гарсан эвдрэл гэмтлийг шуурхай арилган хөдөлгөөнийг саадгүй нэвтрүүлэх, болзошгүй эрсдэлээс урьдчилан сэргийлж, олон нийтэд мэдээлэх  гэх мэт чухал үүрэгтэй салбар.

Энэхүү үзлэгээр Зам, тээврийн улсын алба 12 шалгуур үзүүлэлтээр 80 хувь буюу “Хангалттай” үнэлгээ авлаа. Тухайлбал,

• Зарлан мэдээллийн дохиогоор ажиллахад хоцролт, таслалт гараагүй,
• Салбарын хэмжээнд “Старлинк” сансрын төхөөрөмжтэй нь харилцаа, холбоо тасарсан үеийн мэдээ мэдээлэл солилцох боломжийг бүрдүүлсэн,
• Гамшгаас хамгаалах бэлэн байдлын үзлэг зохион байгуулахтай холбогдуулан бэлтгэл ажлын төлөвлөгөөг гарган хэрэгжилтийг хангуулсан,
• Мэргэжлийн ангийн хүн нэг бүрийн хээрийн үүргэвч, хөдөлмөр хамгааллын хувцас, хэрэгслийн жигдрэлт, гамшгийн үед ашиглах хүч хэрэгслийн бэлэн байдлыг хангуулсан байна.