Зам, тээврийн сайд Б.Дэлгэрсайхан болон Төмөр замын газрын дарга Б.Артур тэргүүтэй төлөөлөгчид БНХАУ-ын Бээжингийн Зам, харилцааны их сургуулийн удирдлагуудыг өнөөдөр /2025.10.28/ хүлээн авч уулзлаа.

Хурлын эхэнд Монгол Улсын төмөр замын тээврийн салбарт танигдсан, төмөр замын салбарын чадварлаг залуу үеийг бэлтгэн ажлын талбарт гаргахад үнэтэй хувь нэмэр оруулсаар ирсэн БНХАУ-ын Бээжингийн Зам харилцааны их сургуулийн дэд захирал Гао Лян тэргүүтэй төлөөлөгчдөд талархал илэрхийлэв.

Үүний дараа Төмөр замын газрын дарга Б.Артур хэлэхдээ “Монгол Улсын Төмөр замын газар болон БНХАУ-ын Бээжингийн зам харилцааны их сургууль хоорондын хамтын ажиллагааны тухай ерөнхий хэлэлцээрийг байгуулах болсондоо баяртай байна. Өмнө нь миний бие 2012 онд Зам, тээврийн яамны Төмөр зам, далайн тээврийн бодлого зохицуулалтын газрын даргаар ажиллах үедээ Зам, тээврийн яам болон Бээжингийн Зам, харилцааны их сургууль хооронд хамтран ажиллах санамж бичиг, хамтын ажиллагааны тухай гэрээ байгуулахад гар бие оролцож ажилласан. Тухайн баримт бичгийн хүрээнд 60 оюутан тэтгэлгээр суралцах нөхцөл боломжоор хангагдаж, төгсөгчид өнөөдөр  “Улаанбаатар төмөр зам” ХНН, “Монголын төмөр зам” ТӨХК, “Тавантолгой төмөр зам” ХХК-уудад мэргэжлээрээ ажиллаж, хоёр улсын хамтын ажиллагааг өргөжүүлэхэд хувь нэмэр оруулж, экспортын болон импортын, дамжин өнгөрөх ачаа тээвэр, хоёр улсын хамтарсан төсөл хөтөлбөрүүдийг хариуцан ажиллаж байгааг онцлон тэмдэглэхийг хүсэж байна.

Энэхүү Хэлэлцээр байгуулагдсанаар төмөр замын салбарт бид цаашид үндсэн 2 чиглэлээр хамтын ажиллагааг өргөжүүлэхийг эрмэлзэж ажиллана. Үүнд:

Нэгдүгээрт, Монгол оюутнуудыг Бээжингийн Зам, харилцааны их сургуульд бакалавр, магистр, докторын зэргээр сургах, мөн төмөр замын ажилтнуудыг мэргэжил дээшлүүлэх, дадлагажуулах богино хугацааны сургалтад хамруулах, ингэхдээ хоёр талаас Засгийн газар, их сургууль, аж ахуйн нэгжийн тэтгэлэг зэрэг боломжит тэтгэлэгт хөтөлбөрүүдэд хамруулах боломжийг түлхүү ашиглахаар хамтран эрмэлзэнэ.

Хоёрдугаарт, хил дамнасан төмөр замын төлөвлөлт, барилга, ашиглалтын менежмент, аюулгүй байдал, дэвшилтэт технологийн нэвтрүүлэлт зэрэг чиглэлээр хамтарсан судалгаа хийж, үр дүнг практикт нэвтрүүлэхтэй холбоотой эрдэм шинжилгээ, судалгааны ажлыг гүйцэтгэх ба үүнд Засгийн газар, олон улсын байгууллага, хөгжлийн сангийн зэрэг байгууллагуудаас дэмжлэг авах боломжийг эрэлхийлэх харилцааг бий болгохоор ажиллана” хэмээн онцлов.

Хариуд нь Зам харилцааны их сургуулийн дэд захирал Гао Лян хэлэхдээ “Монгол, Хятадын төмөр замын хилийн боомтууд нэмэгдэх, Замын-Үүд-Эрээний төмөр замын боомтын өргөтгөл, шинэчлэлийн ажил хийгдэхээр хоёр улсын түвшинд хэлэлцээ хийгдэж байна. Мэдээж эдгээр ажлууд хэрэгжсэнээр төмөр замын салбарын мэргэжилтнүүдийн эрэлт хэрэгцээ улам нэмэгдэх, Монголын төмөр замтай бүх түвшний хамтын ажиллагааг улам гүнзгийрүүлэн ажиллах болно” хэмээн мэдэгдэв.

Уулзалтын төгсгөлд, Монгол Улсын Төмөр замын газар болон БНХАУ-ын Бээжингийн Зам, харилцааны их сургууль хоорондын хамтын ажиллагааны тухай ерөнхий хэлэлцээрт Монголын талаас Төмөр замын газрын дарга Б.Артур, БНХАУ-ын талаар тус сургуулийн дэд захирал Гао Лян нар гарын үсэг зурлаа.