"Нийтийн тээврийг цахилгаанжуулах, сэргээгдэх эрчим хүч рүү шилжих үндэсний чадавхыг бэхжүүлэх" семинар, хэлэлцүүлэг боллоо.

Ногоон технологи, эдийн засгийг дэмжих зорилгоор цахилгаан автомашины хэрэглээг нэмэгдүүлэх талаар Монгол Улсын Ерөнхий сайдын 2023 оны 108 дугаар захирамжаар ажлын хэсгийг байгуулж,  “Цахилгаан автомашины хэрэглээг 2024-2026 онд нэмэгдүүлэх арга хэмжээний төлөвлөгөө”-г боловсруулан Зам, тээвэр, Сангийн, Байгаль орчин аялал жуулчлал, Эрчим хүчний сайд нар хамтран баталж хэрэгжилтийг ханган ажиллаж байна. Дээрх бодлого, төлөвлөгөөний хэрэгжилтийн үр дүнд манай автотээврийн хэрэгслийн бүртгэл мэдээллийн сангаас харахад өнгөрсөн онтой харьцуулахад хоёр дахин нэмэгдсэн талаар хэлэлцүүлгийн үеэр экспертүүд онцлов.

Энэ үеэр Зам, тээврийн яамны Мэдээллийн технологийн хэлтсийн дарга Д.Гэрэлням хэлсэн үгэндээ “Монгол Улс Хөгжлийн урт хугацааны бодлогын баримт бичиг болох “Алсын Хараа-2050”-даа “Нүүрстөрөгч багатай, бүтээмжтэй, хүртээмжтэй ногоон эдийн засгийг хөгжүүлж уур амьсгалын өөрчлөлтийг сааруулах олон улсын хүчин чармайлтад хувь нэмэр оруулна” хэмээн заасан байгаа. Хүлэмжийн хийн ялгарлыг бууруулахад Монгол Улсын “Үндэсний хувь нэмэр” болон Парисын хэлэлцээрийг хэрэгжүүлэхэд цахилгаан автомашины хэрэглээг нэмэгдүүлэх нь чухал гэж бид үзэж байна.

Иймд цахилгаан тээвэр, сэргээгдэх эрчим хүч рүү шилжих сэдвээр салбар дундын хэлэлцүүлгийг анх удаа зохион байгуулж байна. Уг хэлэлцүүлэгт ЭХЯ, Нийтийн тээврийн бодлогын газар, оролцогч тал, байгууллага, компаниудын төлөөлөл хүрэлцэн ирсэнд талархаж байна.  Төр, хувийн хэвшлийн түншлэлийн тухай хуулийн хүрээнд бас  хувийн хэвшилтэйгээ хамтран цахилгаан тээврийн хэрэгслийн хэрэглээг нэмэгдүүлэх талаар ажиллах  боломж байна.

Өнөөдрийн хэлэлцүүлгийг зохион байгуулж байгаа НҮБ-ын Ази номхон далайн эдийн засаг, нийгмийн комиссын Тээврийн хэлтсийн доктор Мадан Рэгми болон бусад илтгэгч, судлаачид та бүгдэд баярласнаа хэлж, та бүхэн өөрсдийн туршлагаа хуваалцаж, үнэтэй санал, зөвлөмж өгнө гэдэг итгэж байна” хэмээн онцоллоо.