Зам, тээврийн яамны Төрийн нарийн бичгийн даргын шуурхай ээлжит хурал өнөөдөр /2025.10.30/ боллоо. Хурлын эхэнд аравдугаар сарын 16-ны өдрийн 04 дүгээр шуурхай хуралдаанаас өгсөн үүрэг даалгаврын биелэлтийг танилцуулсан бөгөөд 70-100 хувийн биелэлттэй явж байгаа юм.

Үүний дараа яамны газар, хэлтсийн дарга нар салбар тус бүрийн төлөвлөгөөт ажлын явц, хэрэгжилтээ танилцуулж, Төрийн нарийн бичгийн дарга Б.Насантогтох удаашралтай байгаа ажлуудыг яаравчлуулах, тулгамдсан асуудлуудыг шуурхай шийдвэрлэх үүрэг даалгаврыг өглөө.

Юуны өмнө Зам, тээврийн яаманд гаднаас 5-6 аудитын байгууллага ирж, шалгалт хийж байгаа бөгөөд газар, хэлтсийн дарга нарыг мэдээллээр хангаж ажиллахыг даалгав. Мөн улсын хэмжээнд өвөлжилт хүндэрч болзошгүй байгаа тул олон улс, улсын чанартай автозамын нөхцөл байдлын талаарх цаг үеийн мэдээллийг танилцуулж, 10 дугаар сарын 15-ны өдрийн байдлын зам, тээврийн салбарын хэмжээнд өвөлжилтийн бэлтгэл ажил 92,45 хувийн биелэлттэй байгааг мэдээлэв.

Санхүү, хөрөнгө оруулалтын хэлтсийн хувьд, оны сүүлч үе ирж байгаа тул байгууллагуудтай тооцоо нийлэх ажил эхэлсэн бөгөөд албан хаагчдын дотоод томилолтын асуудлыг шийдвэрлэхээр ажиллаж байгаагаа мэдээллээ.

Мэдээллийн технологийн хэлтэст ГХЯ, ТЕГ-ын хамтарсан ажлын хэсэг Кибер, аюулгүй байдлын эрсдлийн үнэлгээг хийж байгаа бөгөөд энэ талаар албан хаагчдад мэдээлэл өгч, зөвлөмж хүргүүлж ажиллах гэнэ.

Иргэний нисэхийн бодлого зохицуулалтын газрын хувьд, Иргэний нисэхийн багц дүрэм буюу 53 дүрэм батлагдсан бөгөөд Үндэний аудитын газраас аудитын шалгалт хийгдэж байгаа юм. 2026 оны төсөв хэлэлцэж байгаатай холбогдуулан иргэний нисэхийн салбарт нэн шаардлагатай чухал хөрөнгө оруулалт, шинэчилж сайжруулах, яаралтай хийх ажлуудаа дахин зөвлөлдөж, саналаа нэгтэх, төлөвлөсөн ажлуудаа эрчимжүүлэхыг үүрэг болгов.

Автотээврийн бодлого зохицуулалтын газрын хувьд, Итали болон Болгарын Засгийн газрын хэлэлцээрийг ирэх буюу арваннэгдүгээр сард байгуулахаар хэлэлцээрийн шатанд явж байгаагаа танилцуулаад, Автотээврийн тухай хуулийн шинэчилсэн найруулгын төслийг энэ намрын чуулганаар хэлэлцүүлэхээр ажиллаж байгаагаа дуулгав.

Хурлын төгсгөлд, сайдын шуурхай хуралдаанаас өгсөн үүрэг даалгаврыг шуурхай биелүүлэх, Зам, тээврийн яамны албан хаагчидтай хийсэн уулзалтаас гарсан санал, хүсэлтийг ажил хэрэг болгоход анхаарч ажиллахыг газар, хэлтсийн дарга нарт үүрэг болголоо.