Зам, тээврийн яамны Төрийн нарийн бичгийн дарга Б.Насантогтох Дэлхийн банкны Зам, тээврийн ахлах мэргэжилтэн Эдвард Эндрью Бюкес тэргүүтэй төлөөлөгчдийг өнөөдөр /2025.11.13/ хүлээн авч уулзлаа.

Талууд уулзалтаар Монгол Улсын бүс нутгийн автозамыг шинэчлэн сайжруулах, хөгжүүлэх чиглэлд хэрэгжих төсөл хөтөлбөрүүдийн талаар өргөн хүрээтэй санал солилцлоо.

Хурлын эхэнд Төрийн нарийн бичгийн дарга Б.Насантогтох “Монгол Улсын тээврийн холболт болон логистикийг сайжруулах төсөл”-ийг амжилттай хэрэгжиж байгааг дуулгаад барилгын ажлын бэлтгэлийг хангах ажлууд хийгдэж эхэлсэн бөгөөд үндсэн засварын ажил 2026 оны дөрөвдүгээр сарын 01-ний өдрөөс эхлэнэ гэдгийг онцоллоо.

Мөн төслийн хүрээнд хэрэгжих “Багц 6” дугаар хэсэг буюу Өвөрхангай аймгийн Есөнзүйл сум хүртэлх 14.7 км хатуу хучилттай авто замын гүйцэтгэгчийг сонгон шалгаруулах тендерийг зарласан боловч шаардлага хангасан оролцогч оролцоогүй тул дахин тендер зарлах нөхцөл үүсээд байгааг хэллээ.

Төлөөлөгчдийн зүгээс Дэлхийн банкны зүгээс “Монгол Улсын авто замын салбарт уур амьсгалын өөрчлөлтөөс бий болж буй цэвдгийн эрсдэлийг бууруулах техник туслалцааны төсөл” – ийг Япон Улсын Засгийн газартай хамтран хэрэгжүүлж эхлүүлэхээр бэлтгэл ажлыг хангаж байгааг онцлоод энэхүү төсөл нь Монгол Улсын авто замын салбарт уур амьсгалын өөрчлөлтөөс бий болж буй цэвдгийн нөлөөгөөр үүссэн авто замын эвдрэлийн асуудлыг шийдвэрлэхэд томоохон нөлөө үзүүлнэ.

Дээрх шалтгаанаар үүссэн эвдрэлээс болж зам, тээврийн осол их гарч байгаа тул төслийг яаралтай эхлүүлж, үр дүн яаралтай гаргах талаар Зам, тээврийн яамны зүгээс онцгой анхаарч ажиллахыг хүслээ.