Дэлхийн 180 гаруй улс жил бүрийн арваннэгдүгээр сарын 25-наас 12 дугаар сарын 10-ны өдрүүдэд “Жендэрт суурилсан хүчирхийлэлтэй тэмцэх 16 хоногийн аян”-ыг нэгдмэл зорилго, нэг уриан дор тэмдэглэн өнгөрүүлдэг. Уг аяны гол зорилго нь хөвгүүд, эрэгтэйчүүдийн идэвхтэй оролцоог нэмэгдүүлж, “хэзээ ч хүчирхийлэл үйлдэхгүй, хүчирхийллийн хажуугаар чимээгүй өнгөрөхгүй” гэсэн зарчмыг баримталдаг.

Энэ жил “ТЕХНОЛОГИ АШИГЛАН ҮЙЛДЭГДЭЖ БУЙ ЖЕНДЭРТ СУУРИЛСАН ХҮЧИРХИЙЛЭЛТЭЙ (ТАҮЖСХ) ТЭМЦЭХЭД НЭГДЬЕ” уриан дор өсвөр үеийнхэн, залуучуудын цахим орчин дахь аюулгүй байдлыг хангах, технологийг ёс зүйтэй, аюулгүй ашиглахыг дэмжих, технологи ашиглан үйлдэх хүчирхийллийг таслан зогсоох, хууль эрх зүйн зохицуулалтыг бэхжүүлэхэд чиглэн ажиллаж байна.

Зам, тээврийн яамны албан хаагчид тус аянд нэгдэж, хүчирхийллийг таслан зогсоох, түүнээс урьдчилан сэргийлэх санаачилгыг дэмжин ажиллах бөгөөд өөрсдийн нөөц бололцоонд тулгуурлан холбогдох үйл ажиллагааг санаачлан зохион байгуулж, дэмжин ажиллахыг харьяа байгууллага, салбарын ААН-үүдэд уриалж байна.