Зам, тээврийн яамны 2025 оны жилийн эцсийн тайлангийн хурал өнөөдөр /2025.12.26/ болов. Хурлаар салбар тус бүр 2025 онд хийж гүйцэтгэсэн ажлуудаа нэгтгэн дүгнэж, алдаа оноо, амжилт бүтээл, ажлын үр дүнгээ хэлэлцлээ. Мөн 2026 онд хийж хэрэгжүүлэх ажлын төлөвлөгөөг танилцууллаа.  Энэ онд зам, тээврийн салбарт хэд хэдэн бүтээн байгуулалтын ажлыг ашиглалтад хүлээж авч, зарим бүтээн байгуулалтын төслийг эхлүүлжээ.

Хурлын эхэнд Зам, тээврийн сайд Б.Дэлгэрсайхан хэлсэн үгэндээ “Өнгөрч буй 2025 он бол зам тээврийн салбарын хувьд дэд бүтэц, бүтээн байгуулалтын ажлаа эрчимжүүлж, улс орны нийгэм, эдийн засагт эерэг нөлөө үзүүлэхүйц олон шинэ ажил хийж хэрэгжүүлсэн бодлогын шийдлээр дүүрэн, үр дүнтэй жил байлаа. Энэ бүх ажлын цаана алба хаагчид Та бүхний уйгагүй хөдөлмөр, хариуцлага, мэргэжлийн ур чадвар, хамтын хүчин чармайлт байсныг онцлон тэмдэглэж, салбарын удирдлагын нэрийн өмнөөс гүн талархал илэрхийлье” хэмээн онцлов.

Мөн тэрбээр 2026 онд зам, тээврийн салбарт нийт 121 төсөл, арга хэмжээг хэрэгжүүлж, авто зам, гүүр, нисэх буудал, логистикийн төвүүдийг үе шаттайгаар ашиглалтад оруулахын зэрэгцээ хууль эрх зүй, засаглал, цахим шилжилтийг гүнзгийрүүлэн, авлигагүй, ил тод, үр ашигтай салбарыг төлөвшүүлэхэд анхаарахаа илэрхийллээ.

Үүний дараа Хяналт, шинжилгээ, үнэлгээ, дотоод аудитын газрын дарга Х.Оюунтуяа 2025 оны гүйцэтгэлийн төлөвлөгөөний хэрэгжилтийн хяналт - шинжилгээний тайланг танилцуулав. Тэрбээр гүйцэтгэлийн төлөвлөгөөнд тусгагдсан 90 арга хэмжээний хэрэгжилтийн дундаж үнэлгээ 80.4 хувьтай байгааг онцлоод тайлант хугацаанд хийгдсэн онцлох ажлуудыг танилцуулав. Тухайлбал,

• Агаарын тээврээр энэ онд 12 мян.тонн ачаа, 2.3 сая зорчигч тээвэрлэхээр төлөвлөснөөс хүлээгдэж буй гүйцэтгэлээр 12.7 мянган тонн ачаа, 2,4 сая зорчигч тээвэрлэж, төлөвлөгөөг урьдчилсан байдлаар давуулан биелүүлэх нь тодорхой болсон байна. Мөн Монгол Улсын нутаг дэвсгэр дээгүүр 2025.12.10-ний өдрийн байдлаар 80.2 мянган агаарын хөлөг дамжин өнгөрсөн нь өмнөх оны мөн үетэй харьцуулахад 19%-иар өссөн байна.
• Төмөр замын салбарт том бүтээн байгуулалтууд эхэлснээс Багахангай-Хөшигийн хөндий чиглэлийн төмөр замын суурь бүтцийн ажлыг 96 хувийн гүйцэтгэлд хүргэсэн байна. Мөн “Гашуунсухайт–Ганцмод” хилийн боомтын барилгын бэлтгэл ажлыг бүрэн хангаж, бүтээн байгуулалтын ажлыг эхлүүлээд байна.
• Нүүрсний экспортын зорилтыг бүрэн хэрэгжүүлж, 2025 онд экспортын гадаад худалдаа эргэлтийн 73%, импортын 53%-ийг автотээврээр гүйцэтгэсэн байна.
• 2025 онд улсын төсвийн хөрөнгө оруулалтаар улсын болон орон нутгийн чанартай 393.21 км хатуу хучилттай авто зам, 419 у/м төмөрбетон гүүр, 40.1 км их засвар, шинэчлэлтийн ажлыг хэрэгжүүлэн улсын байнгын ашиглалтад өгч, 39.3 км ээлжит засварын ажил хийж гүйцэтгэсэн байна.

Хурлын төгсгөлд, салбартаа олон жил үр бүтээлтэй ажилласан алба хаагчдыг төрийн одон медаль, салбарын шагнал, жуух бичгээр шагнаж урамшууллаа.