Иргэний нисэхийн ерөнхий газарт санхүүгийн хяналт шалгалт хийсэн тухай

            Иргэний нисэхийн тухай хууль, Засгийн газрын 2015 оны 483 дугаар тогтоолын хавсралтаар баталсан “Дотоод аудитын дүрэм”, Сангийн сайдын 2016 оны 107 дугаар тушаалын хавсралтаар баталсан “Санхүүгийн хяналт шалгалтын стандарт” болон бусад хууль, тогтоомжийг үндэслэн Зам, тээврийн сайдын 2025 оны 03 дугаар сарын 10-ны өдрийн баталсан удирдамжийн дагуу “Иргэний нисэхийн ерөнхий газар”-ын төсөв санхүүгийн үйл ажиллагаа болон дотоод хяналтын үйл ажиллагаанд үнэлэлт, дүгнэлт өгөх, хяналт, шалгалтаар илэрсэн зөрчил дутагдлыг арилгуулах, давтан гаргахгүй байх талаар арга зүйн зөвлөгөө өгөх зорилгоор 2025 оны 03 дугаар сарын 10-с 04 дүгээр сарын 10-ыг хүртэл хугацаанд санхүүгийн хяналт, шалгалтын ажил хийсэн.

Эрсдэл тооцох суурь оноор 2024 оныг сонгож, бусад онуудын үйл ажиллагааг түүвэрлэн үзэх замаар хяналт шалгалтад дараах асуудлуудыг хамруулсан. Үүнд:

1. Төсөв, санхүүгийн холбогдолтой хууль тогтоомж, Засгийн газрын шийдвэр болон тэдгээрийг үндэслэн эрх бүхий байгууллагаас гаргасан дүрэм, журам, заавар, стандарт, гэрээний хэрэгжилт;
2. Өр, авлага барагдуулалт;
3. Орлого төлөвлөлт, төвлөрүүлэлт;
4. Өмч хөрөнгийн ашиглалт, зарцуулалт, хадгалалт, хамгаалалт;
5. Анхан шатны болон нягтлан бодох бүртгэлийн хөтлөлт, санхүүгийн тайлан гаргалт;
6. Төсвийн хөрөнгө оруулалтын ашиглалт, зарцуулалт, үр дүн;
7. Өмнө хийгдсэн шалгалтууд, төлбөр зөрчил, түүний барагдуулалт;
8. Ажлаас үндэслэлгүй халагдсан ажилтанд олгосон нөхөн олговор, шалтгаан;
9. Бусад

Цаг, хугацааг хэмнэх зорилгоор 2024 оны төсөв санхүүгийн үйл ажиллагааны хүрээнд зарим асуудлыг сэдэвчилсэн, түүвэрлэсэн байдлаар, мөн учир шалтгааныг эцэслэн тогтоох зорилгоор өмнөх онуудын баримт материалыг татан үзэх замаар хяналт, шалгалтыг гүйцэтгэсэн болно.

Шалгалтын хүрээнд нийт 13 зөрчил илэрсэн ба ямар эрх зүйн орчин зөрчигдсөн, цаашид хэрхэн зөрчил арилгах, дахин гаргахгүй байх талаар зөвлөмж хүргүүлсэн.

Дээрх зөрчлүүдээс гадна тус газрын бүтэц, орон тоо, Засгийн газрын зохицуулагч агентлаг болсонтой холбоотой үйл ажиллагаанд, дотоод аудит болон дотоод хяналт шалгалтаар илэрсэн асуудлыг яаралтай шийдвэрлэх, агаарын навигацийн орлогыг үйлдвэрлэлийн үйл ажиллагаа эрхэлж байгаа Иргэний нисэхийн үндэсний төвд шилжүүлэх зэрэг 5 асуудлыг шийдвэрлэж ажиллах талаар зөвлөмж хүргүүлсэн.