Таван толгой төмөр зам ХХК-д санхүү, хүний нөөц болон бусад үйл ажиллагаанд хяналт шалгалт хийсэн тухай

                     Зам, тээврийн сайдын 2025 оны 07 дугаар сарын 23-ны өдрийн А/194 тоот тушаалаар баталсан удирдамжийн дагуу “Тавантолгой төмөр зам” ХХК-ийн санхүү, хүний нөөц болон бусад үйл ажиллагаанд хяналт, шалгалт хийж, компанийн өнөөгийн нөхцөл байдлыг бодитой тодорхойлох, цаашдын үйл ажиллагааг сайжруулахад чиглэсэн үнэлэлт, дүгнэлт, зөвлөмж гаргах ажлыг 2025 оны 07 дугаар сарын 23-ны өдрөөс 08 дугаар сарын 05-ны өдрийг хүртэлх хугацаанд хийж гүйцэтгэлээ.

Хяналт, шалгалтыг санхүү, хүний нөөц болон бусад үйл ажиллагааны баримт материалууд, санхүүгийн гүйлгээний журналууд, нягтлан бодох бүртгэлийн анхан шатны болон бусад баримтуудтай тулгах, харьцуулан үзэх замаар, цаг, хугацааг хэмнэх зорилгоор асуудлыг сэдэвчилсэн, түүвэрлэсэн байдлаар, мөн учир шалтгааныг эцэслэн тогтоох зорилгоор өмнөх онуудын баримт материалыг татан авч, доорх асуудлуудыг хамруулан хяналт, шалгалтыг хийж гүйцэтгэсэн.

Үүнд:

            - Төсөв, санхүүгийн холбогдолтой хууль тогтоомж, Засгийн газрын шийдвэр болон тэдгээрийг үндэслэн  эрх  бүхий  байгууллага,  албан  тушаалтнаас гаргасан дүрэм, журам, заавар, стандарт, гэрээний хэрэгжилт;

          - Хөрөнгийн тооллого, бүртгэл, шилжилт хөдөлгөөн

          - Төслөөр хэрэгжсэн хөрөнгийн тооллого, түүнийг балансад бүртгэх асуудал

          - Шатах тослох материалын төлөвлөлт зарцуулалт;

          - Тухайн  байгууллагуудын эрх бүхий албан тушаалтны хууль тогтоомжоор хүлээсэн үүрэг хариуцлагын биелэлт;

          - Бусад.

Үндэсний аудитаас тухайн компанийн 2023, 2024 оны санхүүгийн тайланд аудит хийж, эдийн засгийн үндсэн үзүүлэлтүүдэд зөвлөмж өгсөн байх тул мэдээллийг давхардуулахгүйгээр хяналт, шалгалтаар илэрсэн зөрчил, асуудлыг танилцуулах, эрсдэлээс урьдчилан сэргийлэх, зөвлөмж өгөх байдлаар тайланг товч бэлтгэсэн.

Шалгалтын хүрээнд нийт 10 зөрчил илэрсэн ба ямар эрх зүйн орчин зөрчигдсөн, цаашид хэрхэн зөрчил арилгах, дахин гаргахгүй байх талаар зөвлөмж хүргүүлсэн.

Мөн 12 асуудлын хүрээнд холбогдох эрх бүхий байгууллагатай хэрхэн хамтран ажиллах, цаашид ямар арга хэмжээ авч ажиллах зөвлөмж, санал өгч ажилласан.