Монгол Улсын Засгийн газрын гишүүн, Зам, тээврийн сайд Б. Дэлгэрсайхан өнөөдөр Испанид төвтэй “INDRA” компанийн төлөөлөгчдийг хүлээн авч уулзлаа.

Уулзалтад Бээжин дэх Испанийн Элчин сайдын яамны Эдийн засаг, худалдааны асуудал хариуцсан Ерөнхий Консул Альфонсо Норьега, Ази–Номхон далайн бүс (APAC) -ийн ATM үйл ажиллагаа хариуцсан захирал Франциско Мадрид, INDRA компани, ATM зах зээл хариуцсан захирал (БНХАУ, Монгол) Лү Бэйя, холбогдох албаныхан оролцлоо.

Талууд энэхүү уулзалтаар Монгол Улсын агаарын нисэхийн аюулгүй ажиллагаа болон аюулгүй байдлыг хангахад чиглэгдсэн тоног төхөөрөмжийг шинэчлэх чиглэлээр харилцан санал солилцлоо.

Зам, тээврийн сайд Б.Дэлгэрсайханы хувьд,  Монгол Улсын 2026 оны төсвийн тухай хуулиар анх удаа агаарын навигацийн үйлчилгээний хураамжаас улсын төсөвт төвлөрүүлэх хэмжээг бууруулж, 40 тэрбум төгрөгийг олон улсын нислэгийн аюулгүй байдлыг хангах навигацийн техник, тоног төхөөрөмжийн шинэчлэл хийхэд зарцуулах боломжийг шийдвэрлэж өгсөн. Энэ ажлын хүрээнд иргэний нисэхийн аюулгүй ажиллагаа болон аюулгүй байдлыг хангахад чиглэгдсэн навигацийн тоног төхөөрөмжийг шинэчлэх чиглэлээр олон улсын байгууллагуутай уулзалт ярилцлагыг шуурхай хийж байгаа билээ.

Испани улсын “Indra” технологийн компанийн хувьд, автоматжуулалт, агаарын тээвэр, навигаци, аюулгүй байдал, харилцаа холбоо, хяналтын чиглэлээр олон улсын түвшинд өргөн хүрээтэй хамтран ажилладаг. Тухайлбал, АНУ,  Герман, Их Британи, Хятад, Энэтхэг зэрэг улсад агаарын хөдөлгөөний удирдлагын систем болон агаарын навигацийн тоног төхөөрөмж болох радар, удирдлагын систем, аюулгүй байдлыг хангах дэвшилтэт технологиудыг нийлүүлдэг юм байна.

Монгол Улсын хувьд тус компани нь 2009 оноос эхлэн хамтран ажилласан бөгөөд манай улсад нийт 7 ширхэг нислэгийн хөдөлгөөнийн удирдлагын систем нийлүүлж байсан түүхтэй. Эдгээр тоног төхөөрөмжүүдээс өнөөдөр 5 радар хэвийн ажиллаж байгааг албаныхан хэллээ. Тухайлбал, Баянхонгор аймгийн Бөмбөгөр,  Дорноговь аймгийн Сайхандулаан, Хэнтий аймгийн Бор-Өндөр, Дундговь аймгийн Өлзийт, Хэнгэрэгтэй сумдад радиолокаторын систем ажиллаж байна.

Талууд цаашид хоёр улсын хамтын ажиллагааны хүрээнд Монгол Улсын  агаарын тээвэр, иргэний нисэхийн салбар дахь хамтын ажиллагааг өргөжүүлэх, агаарын хөдөлгөөний удирдлагын болон агаарын навигацийн тоног төхөөрөмжийг шинэчлэх төсөл арга хэмжээн дээр хамтран ажиллах чиглэлээр санал солилцлоо.

Зам, тээврийн сайд Б.Дэлгэрсайхан тус компанийн төлөөлөгчдөд 2026 онд Монголын агаарын хяналтын чадварыг сайжруулж, олон улсын нислэгүүдийн хөдөлгөөнийг илүү аюулгүй найдвартай болгох ажлуудыг богино хугацаанд хийх зорилготой байгаагаа дуулгаад, Indra” технологийн компанийн зүгээс манай улсад нийлүүлж болох тоног төхөөрөмж, үнийн санал, ажлыг аль болох богино хугацаанд суурилуулж, үйл ажиллагааг жигдрүүлэх ямар боломж,давуу тал байгаа талаар ЗТЯ-ны Иргэний нисэхийн салбарын дарга удирдлагууд, нарийн мэргэжлийн хүмүүстэй дахин уулзаж ярилцах, чиглэлээ илүү тодорхой болгохыг зөвлөлөө. Мөн салбарын сайдын хувьд ИНЕГ, “Индра” компанийн хамтын ажиллагааны түүх, ажлын туршлагыг харгалзан бодлогоор дэмжиж, хамтран ажиллах боломжтой гэдгээ илэрхийллээ. Гэхдээ энэ чиглэлд бид олон уулзалт ярилцлагуудыг хийж байгаа учраас ажлыг аль болох богино хугацаанд, 2026 ондоо багтаан шуурхай хариуцлагатай хийхыг чухалчилж байгаагаа онцлов.