Монгол Улсын Засгийн газрын гишүүн, Зам, тээврийн сайд Б.Дэлгэрсайхан тэргүүтэй төлөөлөгчид өнөөдөр (2026.02.17) Бүгд Найрамдах Франц улсын ИНАК (ENAC) буюу Үндэсний иргэний нисэхийн их сургуулийн Дэд ерөнхийлөгч Nicolas CAZALIS, холбогдох албаны төлөөлөгчидтэй уулзлаа.

Уулзалтаар талууд Монгол Улсын иргэний нисэхийн салбарт боловсон хүчин бэлтгэх, олон улсын сургалтын хөтөлбөр бүхий сургалтын баазыг бий болгох, агаарын навигацийн үйлчилгээ, нисэхийн аюулгүй байдлыг шинэчлэн сайжруулах, боловсон хүчний чадавхийг нэмэгдүүлэх, ажлын байран дахь дадлага, сургалтын орчныг бүрдүүлэх талаар харилцан санал солилцож, хамтран ажиллах боломжуудыг хэлэлцлээ.

ИНАК (ENAC) буюу Үндэсний иргэний нисэхийн их сургууль нь 1949 онд байгуулагдсан, Европын болон Францын иргэний нисэхийн салбарын тэргүүлэх сургуулийн нэг бөгөөд Тулуз хотод төв кампустай, нийт 9 салбар сургуультай, иргэний нисэхийн салбарын мэргэжилтнүүдийг бэлтгэх гол төв юм.

ИНАК нь нисгэгч, агаарын хөдөлгөөний удирдлагын ажилтан, нисэхийн инженер техникийн мэргэжилтэн, аюулгүй байдлын менежер зэрэг чиглэлээр мэргэжилтэн бэлтгэдэг. Жилд ойролцоогоор 3 0 мянган Францын болон олон улсын оюутан суралцдаг сургууль юм.

Монгол Улсын хувьд, Монголын Иргэний Нисэхийн Ерөнхий Газар (ИНЕГ), Иргэний Нисэхийн Үндэсний Төв ТӨХХК зэрэг байгууллагууд 2025 онд ENAC-тай хамтын ажиллагааны санамж бичиг байгуулж, мэргэжилтэн бэлтгэх, технологи, сургалтын чиглэлээр хамтран ажиллаж эхэлсэн байна.

Уулзалтаар Франц улсын Үндэсний иргэний нисэхийн их сургуулийн Дэд ерөнхийлөгч Nicolas CAZALIS тэргүүтэй төлөөлөгчид Зам, тээврийн сайд Б.Дэлгэрсайханыг Франц улсын Тулуз хотод хүрэлцэн ирж, ENAC-т ажил хэрэгч уулзалт өрнүүлж буйд талархал илэрхийлж, Монгол Улсын иргэний нисэхийн салбарт хэрэгжүүлэх төсөл хөтөлбөрийг бодит ажил хэрэг болгоход байгууллага хоорондын хамтын ажиллагааны механизмыг бэхжүүлэх, боловсон хүчнийг шат дараатай бэлтгэх чиглэлд нягт хамтран ажиллахаа илэрхийллээ.

ИНАК-ийн Дэд ерөнхийлөгч Nicolas CAZALIS Монгол Улсад 2026-2028 оны хооронд Тулуз дахь ENAC-ийн байранд болон Улаанбаатар хотод сургагч багш нарыг илгээн нийт 550 цаг буюу хамгийн их сургалтын цагийг төлөвлөн дадлагжигч бэлтгэж ажиллана гэдгээ хэллээ. Тухайлбал, иргэний нисэхийн салбарт хамгийн эрэлт хэрэгцээтэй мэргэжлээр буюу нислэг хөдөлгөөний аюулгүй ажиллагааны автомажуулсан төхөөрөмжийн ахисан түвшний сургалт, олон улсын эрэн хайх ажиллагааны сургалт, агаарын навигацийн үйлчилгээний аюулгүй ажиллагааны менежмент, ажлын байранд дахь дадлагжуулсан сургалт зэрэг чиглэлээр дадлагжигч бэлтгэх чиглэлээр хамтран ажиллахаа илэрхийллээ.

Уулзалтын төгсгөлд талууд энэхүү уулзалт нь Монгол Улсын иргэний нисэхийн салбарын шинэчлэлд боловсон хүчин бэлтгэх, техник, технологийн шинэчлэлийг нэвтрүүлэх, аюулгүй ажиллагааны чадавхыг нэмэгдүүлэхэд чиглэсэн өндөр ач холбогдолтой уулзалт боллоо гэдгийг онцлов.