Монгол Улсын Засгийн газрын гишүүн, Зам, тээврийн сайд Б.Дэлгэрсайхан Бүгд Найрамдах Франц Улсад албан томилолтоор ажиллаж байна. Тэрээр айлчлалынхаа хүрээнд өнөөдөр (2026.02.18) Францын төрийн хөрөнгө оруулалт, санхүүгийн байгууллага болох Bpifrance банкны Экспортын зээл хариуцсан Дэд ерөнхийлөгч Olivier Vincent тэргүүтэй төлөөлөгчидтэй албан уулзалт хийлээ.

”Bpifrance” нь Францын Засгийн газрын дэмжлэгтэйгээр стратегийн ач холбогдол бүхий томоохон төслүүдэд хөрөнгө оруулалт хийх, санхүүжилт олгох, экспортын зээлийн баталгаа, даатгалын үйлчилгээ үзүүлэх чиг үүрэг бүхий үндэсний хөгжлийн банк юм. Тус байгууллага нь Францын нийгмийн хөрөнгө оруулалтын банкны хувьд компаниудын өсөлт, инноваци, экспорт болон бизнесийн хөгжлийг дэмжин ажилладгаа танилцуулгадаа онцоллоо.

Уулзалтаар талууд Монгол Улсын зам, тээврийн салбар, тэр дундаа иргэний нисэхийн салбарт техник, технологийн шинэчлэл хийх, томоохон төсөл, хөтөлбөрүүдийг санхүүжүүлэх боломж, дэмжлэгийн талаар дэлгэрэнгүй санал солилцов.

Зам, тээврийн сайд Б.Дэлгэрсайхан иргэний нисэхийн салбарт хэрэгжүүлэхээр төлөвлөж буй төсөл нь салбарын хөгжил, дэд бүтэц, техник технологийн шинэчлэлд чухал алхам болохыг онцоллоо. Тухайлбал, нисэхийн удирдлага, навигаци, харилцаа холбоо, хяналтын системийг шинэчлэн сайжруулах, боловсон хүчин бэлтгэх, чадавхыг нэмэгдүүлэх, сургалтын бааз байгуулах зэрэг ажлуудыг үе шаттай хэрэгжүүлэх нь агаарын тээвэр, иргэний нисэхийн салбарын аюулгүй байдлыг бэхжүүлэхэд онцгой ач холбогдолтойг онцлон тэмдэглэлээ.

Мөн төслийн үр дүнд нислэгийн аюулгүй байдал бүрэн хангагдахын зэрэгцээ Монгол Улсын нутаг дэвсгэрээр дамжин өнгөрөх нислэгийн тоо ойрын жилүүдэд 2–3 дахин нэмэгдэх тооцоололтой байгааг дурдлаа. Тухайлбал, 2025 онд дунджаар өдөрт 200 нислэг үйлдэгдэж байсан бол “Бүсийн нислэгийн хөдөлгөөний удирдлагын төв” барих төслийн үр дүнд нислэгийн тоо нэмэгдэхийн зэрэгцээ агаарын навигацийн үйлчилгээний хураамжийн орлого мөн 2–3 дахин өсөх боломжтой гэв.

Уулзалтын үеэр Bpifrance банк уг төслийн нийт санхүүжилтийн 85 хувийг шийдвэрлэхээр тохиролцоод байгааг талууд онцолж, төслийн санхүүжилтийн гэрээнд өнөөдөр буюу Монгол Улсад үндэсний уламжлалт баяр Цагаан сарын шинийн нэгний билэгт сайн өдөр, Морин цагт гарын үсэг зурах гэж буйг онцлов.

Ноён Olivier Vincent зам, тээврийн салбарын бусад чиглэлд хэрэгжих боломжтой томоохон төслүүдийг дэмжих, хамтын ажиллагааг өргөжүүлэхэд бэлэн байгаагаа илэрхийлэв.