Иргэний нисэхийн тухай хуульд нэмэлт, өөрчлөлт оруулах тухай хуулийн төслийн олон нийтийн хэлэлцүүлгийг 2026 оны гуравдугаар сарын 12-ны өдөр зохион байгууллаа.

Энэхүү хэлэлцүүлэгт Зам, тээврийн яам, Иргэний нисэхийн ерөнхий газар, "Иргэний нисэхийн үндэсний төв" ТӨХХК, "Хүннү Эйр" ХХК, "Изинис Эйрвейз" ХХК, "Монголиан Эйрвейз" ХХК, "Тэнгэрийн Улаач Шинэ" ХХК, Монголын агаарын тээвэрлэгчдийн холбоо, Монголын нислэгийн удирдагчдын холбоо зэрэг байгууллагуудын удирдлага, төлөөллүүд оролцлоо.

Олон улсын иргэний нисэхийн байгууллагаас Иргэний нисэхийн аюулгүй байдлын хяналтын олон улсын Байнгын хяналтын аргачлал (USOAP CMA)-ын хүрээнд бүрэн хэмжээний аудит шалгалтыг Монгол Улсад 2026 оны дөрөвдүгээр сард хийхтэй холбогдуулан тус байгууллагаас дээрх аудит шалгалтын урьдчилсан шатны үзлэг, шалгалтыг 2025 оны есдүгээр сард хийж, одоогийн хүчин төгөлдөр мөрдөж буй Иргэний нисэхийн тухай хуульд Олон улсын иргэний нисэхийн тухай конвенцын зохицуулалтуудыг тусгах, түүний хавсралтаар тогтоосон стандартад нийцүүлэх зөвлөмж өгсөн. 

Мөн Үндэсний аудитын газраас 2025 онд “Иргэний нисэхийн ерөнхий газрын үйл ажиллагааны үр дүн, үр нөлөө”-нд гүйцэтгэлийн аудит хийж, төрийн бодлого, тогтолцооны алдаанаас иргэний нисэхийн салбар мэргэшсэн хүний нөөцийн дутагдал, техник технологийн хоцрогдолд орж, олон улсын өмнө хүлээсэн аюулгүй байдлыг хангах үүрэг алдагдах эрсдэлтэй байгаа талаар дүгнэлт гаргасан зэргээр Иргэний нисэхийн тухай хуульд нэмэлт, өөрчлөлт оруулах хэрэгцээ, шаардлага үүссэний дагуу хуульд оруулах нэмэлт, өөрчлөлтийн төслийг олон нийтэд болон иргэний нисэхийн салбарын байгууллага, агаарын тээвэрлэгч, мэргэжлийн холбоодын төлөөллүүдэд танилцуулж, харилцан санал солилцон, нээлттэй хэлэлцүүлэг зохион байгууллаа.