Монгол Улсын Хөдөлмөрийн баатар, Гавьяат тээвэрчин

Шагдарын Дашцэрэн

(1944-2026)

Улаанбаатар хотын автобусны 1 дүгээр баазын ахмад тээвэрчин, Монгол Улсын Хөдөлмөрийн баатар, Гавьяат тээвэрчин, зөвлөх инженер Шагдарын Дашцэрэн 2026 оны 3 дугаар сарын 17-ны өдөр таалал төгсөж, бидэнд нөхөж баршгүй гарз тохиолоо.

Ш.Дашцэрэн нь 1944 онд Говь-алтай аймгийн Тайшир суманд төрж, Улаанбаатар хотын Төмөр замын техникумыг автомеханикч, ОХУ-ын Иркутск хотын Политехникийн дээд сургуулийг Инженер-механикч мэргэжлээр төгссөн.

Ш.Дашцэрэн нь 1965-1966 онд УБТЗ-ын техникумд лаборант, 1966-1967 онд Улсын тээврийн хороонд мэргэжилтэн, 1973-1978 онд Тээврийн яаманд мэргэжилтэн, хэлтсийн дарга, 1978-1982 онд Шуудан тээврийн 2 дугаар бааз, 1982-1989 онд Автобусны комбинат, 1989-1997 онд Хотын Тээврийг удирдах газрын даргаар, 1997 -2009 онд Автобус-1 компанийн захирлаар, 2009-2014 онд тус компанид зөвлөхөөр тус тус ажиллаж, гавьяаныхаа амралтад гарсан байна.

Ш.Дашцэрэн нь МАХН-ын 19 дүгээр их хурал, Тэргүүний тээвэрчдийн улсын 2 дугаар зөвөлгөөнд төлөөлөгчөөр оролцон, сүүлийн 33 жил нийслэлийн нийтийн тээврийн салбарт ажиллахдаа 1983-1990 онд автобусны эдэлгээг уртасгах, ашиглалтгүй зогсч байсан автобусыг сэлбэн засч үйлчилгээнд оруулах хөдөлгөөн өрнүүлж, жолооч кондукторыг 2 ээлжтэй болгон, ажиллагчдыг хөдөлмөрийн хүнд нөхцөлд хамруулан, 400 автобусны Засвар үйлчилгээний станцыг бариулж ашиглалтанд хүлээн авч, ЗХУ, БНСЧСУ-аас автобус нийлүүлэх, гадаадын мэргэжилтэнгүүдийг дагалдуулан техник, ашиглалтын ажилтнуудыг сургаж дадлагажуулах, Ажилчдын соёлын ордон, Ардын театр, Дизайны хамтлаг, Тээврийн түүхийн музей, Автобус баазын гэрэл зургийн үзэсгэлэн, ажилтнуудыг орон сууцаар хангах, туслах аж ахуй эрхлэх, явуулын гуанз, ахуй үйлчилгээ, 54, 94 дүгээр хүүхдийн цэцэрлэг тохижуулах зэрэг олон ажлыг санаачлан хэрэгжүүлж, нийгмийн асуудлыг шийдсэнээр тээвэрчдийн урам зоригийг нь сэргээж цаг, рейс, орлогын даалгаврыг ханган биелүүлж, 1987, 1988 онд байгууллагаараа улсын аварга хамт олон болсон билээ.

Зах зээлд шилжсэн 1990-1994 оны үед төвлөрсөн хангамж үгүй болсноор Чех, Орос, Хятад улсын үйлдвэрлэгчидтэй шууд харилцаа тогтоож, сэлбэг нийлүүлэх, төр засагт нийтийн тээврийн хүнд байдлыг танилцуулан, гадаадын тусламж, хөнгөлөлттэй зээлийг энэ салбарт зарцуулах санал тавьж, 1995-2006 онд Японы Засгийн газрын тусламжаар Нийслэлийн тээврийг сэргээх 3 үе шаттай төслийг Автобусны 1 дүгээр бааз дээр амжилттай хэрэгжүүлж, Ниссан, Хино маркын 100 автобус, Засвар үйлчилгээний станц хүлээн авч, ажилтнуудын цалин хөлсийг нэмэгдүүлэх, болзолт уралдаан зарлаж дүгнэх, хөдөлмөрийн аваргуудыг гадаад дотоодод байгууллагын зардлаар аялуулах, салбарын болон хот дүүрэг, төрийн дээд шагналд тодорхойлох, зорчигч урсгалын судалгаа хийж, график маршрутыг оновчтой болгох зэрэг үйлчилгээний хэвийн жигд ажиллагааг хангах талаар олон зүйл санаачлан хэрэгжүүлж хөдөлмөрийн бүтээмжийг нэмэгдүүлэн, Үндэсний бүтээмжийн шагнал, Үндэсний Топ байгууллага, Татвар, Нийгмийн даатгал төлөгч тэргүүний хамт олон, Хүүхдэд ээлтэй байгууллага, Хэрэглэгчдийн эрх ашгийг хамгаалагч байгууллага зэрэг олон шагнал хүртсэн, зарчимч шаардлагатай, хамт олны дунд нэр хүндтэй, тэргүүний удирдагч байлаа.

Ш.Дашцэрэн нь Y-YII дугаар 5 жилийн гавшгайч, Ардын хувьсгалын 70, 80, 90, 100 жилийн ойн медаль, МХЗЭ-ийн 50.60 жилийн ойн медаль, 1980 онд Атарчдын алдар медаль, 1981 онд Хөдөлмөрийн хүндэт медаль, 1985 онд Онц тээвэрчин цолоор, 1998 онд МҮЭ-ийн Хүний төлөө медаль, Монголын ахмадын хорооны хүндэт тэмдэг, 1991 онд Алтан гадас одон, 1999 онд Гавъяат тээвэрчин цол, 2006 онд Хөдөлмөрийн баатар цол, 2011 онд Улаанбаатар хотын Хангарьд одонгоор тус тус шагнагдаж байжээ.

Түүний төлөв даруу, элэгсэг дотно дүр төрх, шударга зарчимч байдал, нийслэлийн нийтийн тээврийг хөгжүүлэхэд оруулсан үнэтэй хувь нэмэр нь бидний сэтгэл зүрхэнд үүрд хоногшин үлдэх болно.

Ум сайн амгалан болтугай.

Хүндэтгэсэн

Зам, тээврийн сайд Б.Дэлгэрсайхан

Дэд сайд Г.Ганболд

Төрийн нарийн бичгийн даргын үүргийг түр орлон гүйцэтгэгч Б.Болор-Эрдэнэ

Ахмадын хороо, албан хаагчид