Оросын Холбооны Улсаас Монгол Улсад суугаа Элчин сайдын яамнаас 2026 оны 05 дугаар сарын 21-24-ний өдрүүдэд Оросын Холбооны Улс (ОХУ)-ын Благовещенск болон Бүгд Найрамдах Хятад Ард Улсын Хэйхэ хотноо зохион байгуулагдах Орос, Хятадын эдийн засгийн “АмурЭкспо” чуулга уулзалтад Монголын төлөөлөгчдийг оролцохыг урьсан болно.

Тус чуулга уулзалтын гол зорилго нь бүс нутгийн болон дэлхийн эдийн засгийн хүрээнд төр хоорондын хамтын ажиллагааг бэхжүүлэх, Орос, Хятадын худалдаа, хөрөнгө оруулалт, үйлдвэрлэлийн хамтын ажиллагааг өргөжүүлэхэд чиглэж байгаа бөгөөд 2026 оны гол сэдэв нь “Дэлхийн болон бүс нутгийн эдийн засгийн ашиг сонирхлын үүднээс төр хоорондын хамтын ажиллагааг бэхжүүлэх нь” байна.

Түүнчлэн чуулга уулзалтын хүрээнд салбар хуралдаан, Орос-Хятадын барилгын II форумын стратегийн хуралдаан, бизнес уулзалт, B2B хэлэлцээр, шинжлэх ухааны болон бүс нутгийн бодлогын хэлэлцүүлэг, оюутан, залуучуудын оролцоотой бүтээлч арга хэмжээнүүд зэрэг 50 гаруй үйл ажиллагаа зохион байгуулагдахаар төлөвлөгдөж байна.

Мөн чуулга уулзалтын үеэр Благовещенск хотын Нийгэм-соёлын төв болон гадаа талбайд ПродЭкспо – хүнс, хөдөө аж ахуй, эко бүтээгдэхүүн, ТехЭкспо автомашин, тусгай техник, эрчим хүч, ПромЭкспо – аж үйлдвэр, барилга, технологи, ТурЭкспо – аялал жуулчлалын бүтээгдэхүүн, дэд бүтцийн чиглэлээр үзэсгэлэн гарна.

Холбоо барих:

Дорнын эдийн засгийн чуулга уулзалтын нэгдүгээр орлогч дарга Алексей Геннадьевич Николаев (+7-903-295-01-80, alexey.nikolaev@roscongress.org).