Зам, тээврийн яамны Төрийн нарийн бичгийн дарга М.Баярмагнай БНСУ-ын Дуньян их сургуулийн Олон улсын төмөр замын инженерийн тэнхмийн эрхлэгч, профессор Чон Хюг Сан, Глобал дэд бүтцийн инженерийн тэнхмийн ажилтан Б.Батчимэг нарыг хүлээн авч уулзлаа.

Уулзалтаар талууд Зам, тээврийн яамны тэтгэлгээр суралцаж буй оюутнуудын сургалтын явц, хөтөлбөрийн хэрэгжилтийн үр дүнтэй танилцах, Бүгд Найрамдах Солонгос Улсын Дунянь Их сургуулийн болон Монгол Улсын төмөр замын салбар дахь хамтын ажиллагааны явц, оюутан солилцооны хөтөлбөрийн хэрэгжилтийн талаар санал солилцлоо.

Уулзалтын эхэнд Төрийн нарийн бичгийн дарга М.Баярмагнай Монгол Улсын Зам Тээврийн Яам болон БНСУ-ын Дуньян их сургууль хооронд байгуулсан санамж бичгийн хүрээнд Монгол Улсын төмөр замын салбарын хүний нөөцийг бэлдэх, 2 улсын төмөр замын технологийг боловсронгуй болгохоор ажиллаж буй сэтгэл хангалуун байгаагаа илэрхийлэв.

Үүний дараа профессор Чон Хюг Сан сургуулийнхаа танилцуулга болон тэтгэлгээр суралцаж буй оюутнуудын сургалтын явцын мэдээллийг өгөв. Тухайлбал, БНСУ-ын Дунянь их сургууль нь төмөр замын технологи, тээврийн инженерийн чиглэлээр мэргэжилтэн бэлтгэдэг боловсрол, судалгааны байгууллага бөгөөд Солонгос улсын төмөр замын салбарын хүний нөөцийг бэлтгэхэд чухал үүрэг гүйцэтгэдэг. Тус сургууль нь төмөр замын инженер, төмөр замын дохиолол болон холбооны систем, төмөр замын механик инженер, засвар үйлчилгээ, тээврийн удирдлага, төмөр замын үйл ажиллагааны менежмент зэрэг чиглэлээр сургалт явуулдаг.

Тус сургууль нь Seoul, Yeongju болон Dongducheon хотод кампустай бөгөөд Cолонгоc улс дахь хамгийн анхны төмөр замын сургууль юм. Мөн 5 салбар сургууль, 2 төв байр, 27 тэнхим, 18 харьяа байгууллага болон 15 эрдэм шинжилгээний судалгааны хүрээлэнтэй.

2025-2026 оны хичээлийн жилд тэтгэлэгт нийт 17 оюутан Олон улсын төмөр замын дэд бүтцийн инженер чиглэлээр суралцаж байгаа бол энэ жил 30 оюутныг элсүүлж сургах аж.

Төрийн нарийн бичгийн дарга М.Баярмагнай хэлэхдээ “Зам, тээврийн яам БНСУ-ын Дуньян их сургуультай хийж буй хамтын ажиллагаандаа сэтгэл хангалуун байдаг. Төмөр зам, дэд бүтцийн салбар нь Монгол Улсын эдийн засгийн тулгуур салбарын нэг. Бид энэ чиглэлээр томоохон төслүүдийг хэрэгжүүлж байна. Удахгүй нийслэлийн хэмжээнд метро, LRT чиглэлийн төслүүд мөн хэрэгжихээр бэлтгэл ажил хангагдаад явж байна. Иймд бидэнд төмөр замын салбарын хүний нөөц ихээхэн шаардлагатай байгаа тул бид цааш цаашдаа хамтын ажиллагаа үргэлжүүлэх бүрэн боломжтой” хэмээв.